گئجیکمه - بختیار وهاب زاده

گئجیکمه - بختیار وهاب زاده

من همیشه بو گۆندن صاباحا گؤز دیکمیشم،
اما اؤزوم-اؤزومله گؤروشه گئجیکمیشم.
قالاق-قالاق ایشلریم،
دیکلریم، ائنیشلریم،
قلمله دوستلوغومدان گؤیرن وردیشلریم
منی ووران گاه یئره، گاه دا اوچوردو گؤیه،
گئجیکدیم عؤمروم بویو اؤزومله گؤروشمه یه.
ایضطیرابلار ایچینده یوخ اولسام دا واریمدان،
گئجیکمیشم یاز بویو ایستی گؤز یاشلاریمدان.
سو وئریب بئجردیگیم بهریمه، باریما،
گئجیکمیشم ایچیمدن دوغان آرزولاریما.
گئجیکمیشم حیاتی حیاتیمدان اومماغا،
گئجیکمیشم ان اوجا، ان مۆقدّس حیسّیمین
باشینا دولانماغا.
گئجیکمیشم، چوخونو عذابییلا بئزدیرن،
منه سه قاناد وئرن
هر غمه یوخ، الله ین سئودیگی بنده سی نه
پای کیمی گؤندردیگی او مؤحتشم غمه ده.
گئجیکمیشم اوزاقدا مله ین عشقیمه ده.
ماجال دا تاپمامیشام اؤزومله تک قالماغا،
اؤزومدن کۆسدوردوگوم سؽنیق، قؽریق قلبیمی
بیر گۆن اله آلماغا.
واللاه، اؤزوم-اؤزومه چاتا بیلمیرم داها.
قاچ-توتدو اویناییریق، یول اوزون، اؤز-اؤزومو
توتا بیلمیرم داها.
او زامان کی، یورولوب چکیلیرم تکلیگه،
طالعیمله باریشیب، ائندیریرم باشیمی
آمانسیز گئرچکلیگه.
چکیرم گۆندوزومون حئسابینی هر گئجه
اؤز-اؤزومله گیزلیجه...
یانلیش آددیملاریمی درک ائدینجه سونرادان
مین بیر عذاب چکمیشم.
دۆنیایا گلمکده ده، دئیه سن، گئجیکمیشم...