قؽزیما - بختیار وهاب زاده

قؽزیما - بختیار وهاب زاده

گلیرسن، گئدیرسن…
گؤزوم اؤنونده،
بیلمیرسن نه سورور، نه دئییر آتان.
اۆزوندن، گؤزوندن،
هر بیر سؤزوندن
قلبینی اوخوماق ایسته‌ییر آتان.

گلیرسن، گئدیرسن… هئچ نه سورمورام،
باخیشلار دانیشیر، باخیشلار آنجاق.
بیلمک ایسته‌ییرم، آ منیم بالام،
سنی ایسیدیرمی قوندوغون بوداق؟
قؽناما، بلدم من بو حیاتا،
کیم چرخی گئری‌یه دؤندره بیلمیش؟
اؤولادا قؽزیلدان تخت وئرر آتا،
قؽزیلدان بختینی کیم وئره بیلمیش؟
گلیرسن، گئدیرسن.
دییشمیش بیزیم
سؤزوموز، سورغوموز…
بو سن،
بو دا من
ائله گلیرسن کی، ائله بیل، قؽزیم،
بو ائوده دوغولوب بؤیومه‌میسن.

بیر آز یاد اولموسان،
بیر آز اوتانجاق،
اوّلکی ارکینی ایسترم یئنه.
گلنده قوناقسان، گئدنده قوناق،
نه تئز اؤزگه‌لشدی بو اوجاق سنه؟

سنین خیصلتین ده نه تئز دییشدی،
دئمه گیلئیلی‌یم، یوخ، یوخ، شادام من،
سئو کی، سئویله‌سن…
بیزیمکی کئچدی،
ایندی سنین اۆچون ناراحاتام من.

قورو هر لکه‌دن محبّتینی،
هر یئرده،
همیشه،
هر زامان، قؽزیم.

آرخان-آتا ائوی…
سعادتینی
یالنیز ار ائوینده تاپاسان، قؽزیم.