ناغیل حیات - بختیار وهاب زاده
آنام اولسان بئله، آی آنام، خئیلی،
سندن گیلئیلی‌یم، سندن گیلئیلی...
سن دویماق، دۆشونمک اؤیرتدین منه،
دویوب-دۆشونمکدن آزاد اولایدیم.
دانیشماق اؤیرتدین سن اؤز کؤرپه‌نه
نولا، من آنادان لال دوغولایدیم.
دیلینی بیر ایله اؤیرندیم... ناحق!..
اؤز دیلیم اؤزومه کسیلیب یاغی.
بۆتون عؤمروم بویو چالیشدیم، آنجاق
اؤیرنه بیلمه‌دیم دانیشماماغی...
باشیما بلادیر منیم اؤز دیلیم،
دنیزم، اۆزومه دوروب ساحیلیم.
یئریمک اؤیرتدین توتوب الیمدن،
دولاشدیم آرانی، دولاشدیم داغی.
بالانا یئریمک اؤیردینجه سن،
گرک اؤیرده‌یدین یؽخیلماماغی...
فیکیرلر یؽغیلیر بئینیمده قات-قات،
جاوابلار قورخولو، سواللار-یاساق.
حیاتی قانانا اؤگئیدیر حیات،
اونو قانمایانا دوغمادیر آنجاق.
منی اینجیدیرلر بعضاً قصد ایله،
ائرته‌سی هر شئیی اونودورام من.
گیروه دۆشنده ظالیمه بئله
ظۆلم ائدیب، کام آلماق گلمیر الیمدن.
آنا، قودوزلاشیر حیات، ایل‌به‌ایل،
دالاییر پوچ اولان اۆمیدلریمی.
نیه ایستی دئییل، مهریبان دئییل
بو آمانسیز حیات قوجاغین کیمی؟..
هارداسان، آی آنا، بیر گل، من یئنه
بلالی باشیمی قویوم دیزینه.
منه ناغیل دانیش، دایانسین آنلار،
گؤروم، ناغیلداکی او قهرمانلار
جۆتباشلی دیولری نه تهر یؽخیر،
نه تهر گیزلنیب، تیلسیمدن چؽخیر.
بیر دانیش، هاردادیر، گؤروم سعادت؟
بیزیم یوردوموزا او نیه گلمز؟
دانیش، دانیش گؤروم، ملیک محمّد
ظۆلمتدن ایشیغا نئجه چؽخدی بس؟
دانیشما، آی آنام، دانیشما، کیری،
بئینیمه باتماییر بو افسانه‌لر.
دیولر گؤرموشم کی، ناغیل دیولری،
اونلارین یانیندا تویوغا بنزر.
نادانلار گؤرموشم، اؤز یولونداکی
دیکه ائنیش دئییر، دۆزه دیک دئییر.
تۆلکولر گؤرموشم، اؤز قولونداکی
دمیر زنجیرلره بیلرزیک دئییر.
آتاسینی سؤین، یادا باش این
رهبرلر گؤرموشم، قدّار، آمانسیز.
تیکانا گۆل دئین، گۆله کول دئین
قاریلار گؤرموشم دینسیز، ایمانسیز.
قولدورلار گؤرموشم، اؤزگه یئر دئییل،
یوردونو تالاییب، آسوده یاتمیش.
تاجیرلر گؤرموشم، سیم و زر دئییل،
«مالادئس» سؤزونه وطنی ساتمیش.
دۆنیانی بیلندن، دویاندان بری
منیم گؤزلریمدن دۆشوب حیات دا.
ناغیلدا گؤردوگوم قورخونج شئیلری،
حیاتدا گؤرموشم، آنام، حیاتدا.
یانوار، ۱۹۶۴-مای، ۱۹۶۵
