کیمدیر منیم دوشمنیم؟ - بختیار وهاب زاده
کیمدیر منیم
ان قورخولو دوشمنیم؟
کاش بیله یدیم بونو من.
او ضربه وورمامیشدان
کسه یدیم یولونو من.
کیمدیر منیم
دوشمنیم؟
یاخشیمی قویوب
یامانیمی دانیشانمی؟
یوخ!
عئیبلریمی دئییب
آرخامجا گولنمی؟
یوخ!..
منیم نؤقصانلاریمی
مندن یاخشی بیلنمی؟
یوخ! یوخ! یوخ!
اونلارین گؤزلرینی
تاخایدیم اؤز گؤزومه.
اؤزگه لرین گؤزویله
باخایدیم اؤز-اؤزومه.
باجارسایدیم بونو من
بو دونیادا نه دردیم...
من اوندا اؤز-اؤزومو
داها یاخشی گؤرردیم.
اوندا عیبلریمه
اؤزوم دوشمن اولاردیم؛
گؤرسه یدیم اؤز-اؤزومو،
اوندا من، من اولاردیم! آه!..
منی مندن گؤزل
گؤره بیلن دوستلاریم،
آرخامجا قه-قه چکیب
منه گولن دوستلاریم،
گولون، ائله گولون کی،
چاتسین قولاقلاریما
سیزین گولوشلرینیز.
یامانیمی دانیشین،
ائله دانیشینکی، سیز
من ده خبردار اولوم.
دانیشین، قویمایین کی،
من اؤزومه وورولوم.
ان قورخولو دوشمنین
گلرم عؤهده سیندن،
آنجاق اؤزوم اؤزومله
باجارا بیلمیرم من،
باجارا بیلمیرم من.
اؤزوم اؤزللریمله
بیر گون بال ایچیرمسه،
بیر گون زهر ایچیرم.
من حیات یوللاریندان
آیاقلاریملا دئییل،
عقیده مله کئچیرم.
