شعر ترکی زبانحال خانم رقیه به حضرت زینب (س)-رحیم منزوی اردبیلی
عمّه بو ویران سراده بیر دُرِ شاهانیم من
سیز اگر بش گون قوناقسوز بوردا صاحب خانیم من
عمّه من درگاه حقده شامل لطف عمیمم
شیشه ی ناموس عالم ، بنده ی حیّ قدیمم
سیندیروب شمرون جفاسی، یوخسا بیر دِرّ یتیمم
دوشموشم گوزلردن ایمدی چون سینق دردانیم من
شامیده تبلیغیم ایلوب ایله ایجاد تحوّل
آز زمان چکمز ایده لّر شیعه لیق حقّین تقبّل
تیز تاپار قصری یزیدین بو تحرّکدن تزلزل
پایه ی ظلمه مخرّب ، کاخ دینه بانیم من
شام قیزلاری دیوللر بو قیزون یوخدور آتاسی
حالینی ایلور حکایت گوز یاشی کهنه لباسی
باشیمه سن ال چکنده قلبیمون آرتار صفاسی
باشیمه تئز تئز الون چک اللرون قربانیَم من
صبحلر آللام الیمه بو پریشان زلفلریمی
من دعا ایتدوقجه اشگیم ایسلادار ئوز معجریمی
ایلرم دیواره تکیه گوزلرم هی اکبریمی
گوشه ویرانسراده عشق سر گردانیَم من
شاهباز اوج عشقم من بو باغلی شهپریله
سایمارام گلسه یزیدون دختری زیب و زریله
گلسون او زیب و زریله منده کهنه معجریله
ایلیوم مغلوب و رسوا مُلک غم سلطانیَم من
نیلورم زردوز رختی یوزده رنگ زر بسیمدور
ساده پوشم پیکریمده نقض نیلوفر بسیمدور
کهنه بیر پیراهنیله بو قرا معجر بسیمدور
نیلورم تازه لباسی بش گونون مهمانیَم من
شامده چوخ یولداشیم وار یاد ایدر بو تلخکامی
هر گون ایلوللر تعارف شربت و آب و طعامی
غیرتیمدن دادمارام من نان و آب اهل شامی
درسیمی چون سن ویروبسن نفسیده مردانیَم من
اوچ یاشندا من بو شمر نابکاره نیلمیشدیم
آلدی الدن شوکتیمی روزگاره نیلمیشدیم
آخر عمّه من یتیم بخت قاره نیلمیشدیم
حاکم بیداد الینده بی گُنه زندانیمَم من
شمر اولوب ثانّی ثانی منبع ظلم و تعدّی
منده ئوز زهرا آنام تک صبریمون یوخ حصر و حدّی
گل یوزیمده نقش سیلی پیکریمده قمچی ردّی
غسل ایدن وقته گورللر کی بتول ثانیَم من
تاپشور عمّه قبریم اوسته هر کیم ایستور چاره گلسون
هر غریب و دردمند و بیکس و آواره گلسون
کیم چوخ ایستور خاطریمی الده بیر گهواره گلسون
اصغریمی اوخشاماقدا لای لای عطشانیَم من
(( منزوی )) وار بو سپهرون مین بلاسی هر نفسده
شیری زنجیر آلتدا ساخلار مرغ خوش خوانی قفسده
سالسالار سیمرغی دامه اعتنا ایتمز مگسده
عاقلون تکلیفی چوخدور سن دینَن دیوانیَم من
❖ ❖ ❖ ❖ ❖
شعر از : رحیم منزوی اردبیلی
مطالب مرتبط
