سالاماتدی - عاشیق علی عسگر

سالاماتدی - عاشیق علی عسگر

پاسبانی اولدوم من دوست راهینین،
سوروشدوم ئوگرندیم، یار سالاماتدی.
بئله معلوم اولور، شاهلار شاهینین
منه مرحمتی وار، سالاماتدی.

چوخ اوبادان، آغیر ائلدن کئچیبدی،
پلنگ، اژدهالی کولدان کئچیبدی.
جوشغون دریا، داشغین سئلدن کئچیبدی،
ئولدورمه‌ییب بوران، قار، سالاماتدی.

چوخ اذیت ویریب یاغمور برف و باد.
خطرینه دگمه‌ییب نه دشمن، نه یاد.
گوزون آیدین اولسون، کونلون اولسون شاد،
چوخ‌‌دا چکمه انتظار، سالاماتدی.

طبع دگیشیب، حالدان-حالا دونوبدو،
جلوه‌لنیب بیر مارالا دونوبدو،
لبلرینین شهدی بالا دونوبدو،
قوینونداکی بیرجوت نار سالاماتدی.

علی‌عسگرم، بختی قارا چك منی،
قول آدینا سات، بازارا چك منی.
گیله‌ینن ئولدورمه، دارا چك منی،
دیل دییر: گله‌دن دار سالاماتدی.