شعر ترکی حضرت قاسم (ع)-رحیم منزوی اردبیلی
هر یرده گر چه آز اوخونار قاسمون غمی
چاتماز ولی اونون غمینه هیچ کیمون غمی
وقتیکه گلدی خیمیه اکبر جنازه سی
درده گتوردی هر ندن آرتیق او بی کسی
گوردی ئولوبدی یاوری یالقوز قالوب حسین
قانه باتوبدی اکبر اوغولسوز قالوب حسین
گلدی حضور شاهه او شهزاده رشید
عرض ایتدی ای یتیم لره مایه امید
اکبر غونده فکر ائلمه اولما چوخ ملول
من بیر غلام کمتریوم ایلسون قبول
من بیر آتاسیزام سنون اوغلون ئولوب شها
غم چکمه من سنه اوغولام سن منه آتا
گوندر گیدوم مناده اولوم منده سرخ رو
اولاد مجتبایه ائدوم اخذ آبرو
فرمایش ایتدی ای منه آرام جان اوغول
وی قارداشیم نشانه سی روح و روان اوغول
باخ نعش اکبره سن اوغول ائتمه عزم جنگ
قویما دگه بو گل بدنه ناوَک خدنگ
سنّون اوشاقدی سرو قدون نورسیده دور
سن تشنه دشمنون سو ایچوب رزم دیده دور
گلشنده نا شکفته گلی من درنمرم
یالوارما چوخ منایه سنی گورنمرم
شهزاده هر چه خواهش ائدوب اولمادی قبول
آخر قیتدی خیمیه یأسیله دل ملول
آخر خدا یتیم نه اندازه خوار اولار
تای توش یانیندا خوار یاشار شرمسار اولار
گر دوشمسیدی اصغر عم اوغلوم او حالته
آغوشیمه آلوب آپارار دیم وساطته
بیر ایله حالدا که یانور عالم او حالینه
دوشدی آتاسینون سوزی ناگه خیالینه
چکدی یوزومندن اوپدی او سلطان محتشم
بوکدی وصیّتون قولوما باغلادی او دم
تاپشوردی هر زمان ئورگون بولسه غم اوخی
بو نامه نی قولوندان او ساعتده آچ اوخی
امّید شاخه سینده صولوب ایندی که گلوم
قوی نامه نی آچوم آچیلا بلکه مشکلوم
القصّه آچدی نامه نی دلدن چکوب بیر آه
گوردی وصیّتونده بو نوعی یازوب او شاه
ای شاهزاده بیر گون اولار تک قالار حسین
جهد ایله حسینه او گون یاور و معین
ال وئردی شادلیق عالمی شهزاده قاسمه
گلدی حضور شاه سعیده سراسمه
بو نامه نی یازوبدی آتام مجتبی منه
حکم ایلیوبدی جانیمی قربان ائدوم سنه
❖ ❖ ❖ ❖ ❖
شعر از : رحیم منزوی اردبیلی
مطالب مرتبط
![Share](/sites/all/modules/addtoany/images/share_save_171_16.png)