بس کی، اطرافیما جمع اولدی ملامت داشی - فضولی

بس کی، اطرافیما جمع اولدی ملامت داشی - فضولی

قامتین خدمتینه سروین اگیلمز باشی،
نه بیلیر اهل طریقین روشین اول ناشی.

اؤگونور دیده کی، حیرانم ازل دن اوزونه،
اولدی معلوم بو لافیندا کی، یوخدور یاشی.

اشک لعلی ره عشقینده توتوبدور اتگیم،
قورخولوق دور، نئجه سالیب گئده بو یولداشی؟

یئتدی اول غایته ضعفیم کی، چکر تصویریم
هر زامان دایرۀ حیرته مین نقاشی.

محتسب، تانری ایچون گل منه چوخ وئرمه عذاب،
میل مسجدمی ائدر میکده‌لر اوباشی؟

کسدی من شیفته دن اهل سلامت یولونی،
بس کی، اطرافیما جمع اولدی ملامت داشی.

ای فضولی، نه بلا اوخلاری کیم، گلسه منه،
سبب اول قاشلاری یایین گؤزودور، یا قاشی