غم هجومینده منی اشک ایله پنهان ائتدی - فضولی

غم هجومینده منی اشک ایله پنهان ائتدی - فضولی

دون کؤنول دلبره شرح غم پنهان ائتدی،
جمع ایکن، کؤنلونی بیر پاره پریشان ائتدی.

یئر توتام، دئردی کؤنول، ناله ایله کویینده،
یئتمه‌دی بیر یئره هر نئجه کی، افغان ائتدی.

وعده وئردی جگریم قانین ایچه مژگانین،
انتظارایله بو حسرت جگریم قان ائتدی.

غمزه تیغیله گؤزون کؤنلومی یوز پاره قیلیب،
هر بیرین بیر هدف ناوک مژگان ائتدی.

قیلدی محرابه قاشین فکری فقیهی مایل،
گؤر نئجه کافری اول وعظ مسلمان ائتدی.

گؤرییم چوخ یاشاسین دیده کی، مردم لوک ائدیب،
غم هجومینده منی اشک ایله پنهان ائتدی.

ای اجل، جان طمعین قیلما فضولی دن کیم،
بیر کمان ابرویه چوخ دان اونی قربان ائتدی.