اشعار ترکی عید مبعث - بخش اول
در این بخش از ضیاءالصالحین، اشعار ترکی عید مبعث حضرت محمد مصطفی صلی الله علیه و آله و سلم را تقدیم دوستداران و محبین خاندان رسالت می نماییم. با ما همراه باشید.
« اشعار ترکی عید مبعث »
ای رسول امجد مصطفی محمد
روزبعثت اولدون عالمه سرآمد
اولدی ماسوا روشن
کوه نور اولوب گلشن
مبعثون مبارک
مژده ما سوایه ارضیلن سمایه
دیلده دردیمیز وار گلموشوک دوایه
سن رسول جانان سان
هامی درده درمان سان
مبعثون مبارک
سس گلوب حرادن سمت کبریادن
اقرا بسم ربک جانب خدادن
حق ویروب سنه فرمان
معجزون اولوب قرآن
مبعثون مبارک
دولاندی دوره او وقت اولدی سیّدِ ابرار
ایده رسالتینی اهلِ عالمه اظهار
رجب آیندا قیام ایلدی رسول الله
که خلقی نکتهء توحیددن ایده آگاه
چاقوردی داعیِ حق ، اهلِ شرکی توحیده
موحّد اولماقا مشرک لر ایلیوب اکراه
ایدوبله کعبه کیمی سنگسار ، اهلِ قریش
دیون دیینده او شه لا اله الا الله
گلن دایاندی ، گیدن دوردی هر گلن ووردی
یخلدی توپراقا ، ضعف ایلدی حبیبِ اِلاه
ووروبلا صورتینه سیلی ، ناسزا دیدیلر
توکوبله خار ایاقی آتدا فرقهء گمراه
ز بسکه اینجیدی ترک ایتدی آخر اوز وطنین
ایدوب مدینیه هجرت ، شهِ فلک درگاه
اون ایلده چکدی ریاضت مدینه شهرینده
منوّر ایلدی احکامِ دینی ، همچون ماه
منافقینیله هشتاد دورت جنگ ایلدی
تمام زحمت و ظلمه دایاندی ، چکمدی آه
ووروبلا سنگِ جفا ، نازنین دیشی سیندی
حسینه ویردی بو دیش سنماقینی ارث ، او شاه
اودور حسین دیشینی خیزران شکست ایلدی
یزید ووردی کسوک باشی ، باخدی آل الله
امام باشی ، قیزیل طشت ، خیزران آقاجی؟
کسوک باشندان آخار قان او قانه یوخ خونخواه
شراب مجلسی زینب علیل قول باغلی؟
یره توکولمدی گوگلر نه سِرّی وار الله
او بزمِ شُربده یا فاطمه گوزوندن ایراق
حیالی قیزلاریوا اولمادی معین و پناه
مؤثر اولدی نصارایه زینبون حالی
حصارِ صبرینی فوجِ ملال ایتدی تباه
دوروب ایاقه یریندن دئدی یزیده اوتان
چکولّه گور نجه اطفال ، نالهء جانکاه
بو باش وصیّ پیمبردور یا پیمبردور
گلوب سراغینه الده عصا کلیم الله
بیر عورتی گورورم ساچلارین آلوب الینه
دیور اوغول گوزیمه روزِ روشن اولدی سیاه
باخوب یزید بو احواله ایسته دی جلّاد
سرِ امامه دونوب جاثلیق ایتدی نگاه
یوگوردی سالدی اوزین نازنین باشی اوسته
معاینه دوشنبدور قزل گل اوسته گیاه
خلوصِ قلبیله ایتدی قبول اسلامی
منیم بو حالیمه سسلندی اول یارالی ، گواه
سنون یولوندا منی بو ستمگر ئولدوردی
سنون محبّتون ایتدی وجودیمی پرِ کاه
یارالی باشوه قربان اولوم سن اول شاهد
اقولُ اشهد ان لا اله الا الله
یزید مجلسنون شرحی چوخ مفصّلدور
دایان (حسینی) قیل بو مطلبی کوتاه
هانی امامِ زمان گلسون انتقام آلسون؟
یانان اورکلره سو سپسون اول ولی الله.
مرحوم حسینی سعدی زمان
مژده گتدی صبحدم باد سحر ، کای نیکنام
بو گونون مثلینده دنیایه گلوب خیرالانام
بیر وجودیکه اودور خلقتده اول ماخلق
صبح علم و عالم سر و خفیاته شفق
علت ایجاد هر بیر مالحق دور ماسبق
منجی عالم ، یگانه مصلح عالی همام
بیر وجودیکه اودور سرمایه فخر بشر
ایلیوب دینی جهانه ، امیر خیر و نهی شر
نور رخساری بو گونکی گونده اولدی جلوه گر
پرتو حسنیله روشن اولدی دنیای ظلام
بیر زمان قویدی قدم دنیایه ، بو نفس عزیز
اهل دنیا امر خوب و زشته ویرمزدی تمیز
بیر ایله دنیا که شرحی شرم آور ، ننگ بیز
دشت جهل و کفر سرگردانی هر بیر خاص و عام
ژرف دریای جهالت ایچره دنیا غرقیدی
محض ظلمت ، ظلمت کفریله غرب و شرقیدی
جهل و دانش بیربیریله دهرده بی فرقیدی
طالع اولدی مکه دن بو نیر علم تمام
دوست و دشمن ایچره قرخ ایل بو یتیم روزگار
حسن خلقیله تاپوب دنیاده عمده اشتهار
قرخ سنینده ایدوب مبعوث رب کردگار
خلقه تبلیغ ایلسون خلاقدن امر و پیام
باشلادی تبلیغه تاج بعثتیله تاجدار
مکه نین جاهل لری ایتدی وجودین سنگسار
گاه ساحر ، گاه مجنون آد قویوب اهل نقار
بو جفالر آرتیروب قلبینده تبلیغه قوام
گه وروب سندیردیلار سنگ جفائیله دیشین
ظلم الیله گاه سندی پارچالاندی مه جبین
قانی آخدی گوزلری دولدی بویاندی آستین
عرض ایدردی ائت هدایت امتی ای لاینام
اولمادی عمرینده بیر لحظه اذیتدن کنار
کول توکوبلر باشینه ، گاهی ایاقی آتدا خار
ایلدی تبلیغ احکام الهی هر نه وار
واجبات و مستحبات و حلالیله حرام
چکدی بیر عمر جهاندا رنج و درد بی حساب
گتدی اهل عالمه خلاق عالمدن کتاب
بو کتابی ، ایتدی کفر و جهل بنیادین خراب
نور گلسه ظلمته قالماز بلی جای دوام
بو کتابینده حقوق اجتماع عالمی
کاملاً منظور ایدوب قانون شرع اعظمی
ایتدی مستغنی قوانین بشردن آدمی
تا جهان وار نه بیله قانون اولار نه بو نوع کلام
زینت دینیله دنیانی مزین ایلدی
قتله قتلی ، حفظ جانه حد معین ایلدی
سارقه قطع یدین حدین مبین ایلدی
تا اولا محفوظ جان و مال آزاد و غلام
باغلادی راه زنانی ، علقه تزویجیله
ایلدی محمکم بو سدی چادره ترویجیله
هر زنایه بیر معین حدیله تحریجیله
ضرب و قتل و رجمیله گوستردی طرز اخترام
هر تعدی دن اولا محفوظ اولاد بشر
اهل ناموسه حجاب آیاتی گتدی سر به سر
عالمه کشف حجابی بولدی ناموسه خطر
خوش بیلر بو نکته نی هر صاحب ناموس و نام
بو حجاب امرینده صادر عمده احکام ایلدی
حکمینی حکم ضروریات اسلام ایلدی
رد ایدن هر بیر کسی مرتد اعلام ایلدی
خون مرتدی هدر اعلام ایدوب شرع کرام
حفظ گنج گوهر عصمت ، حجابه بسته دی
فرددن تحصیل جمعیت حجابه بسته دی
چوخ فجایعدن مصونیت حجابه بسته دی
هر مفصل شرحدن بیر عرض مجملدور مرام
گل نه قدری غنچه دور رخساری اوسته وار حجاب
هر حوادثدن قالار محفوظ ، درمز شیخ و شاب
لیک یوز آچسا ، جمالیندن کنار ایتسه نقاب
هر گورن ایلر طمع قطعاً درر هر اهل کام
عقلدن آیریلماسین عمرینده بیردم خاص و عام
شرب هر بیر مسکراتی ایلدی جدا حرام
ایتدی فرمایش شراب ، ام الخبائثدور تمام
زایل عقل و کلید هر بیر جرم ، جام
هر عبادت جمله طاعت دشمنی جام اولدی جام
عزت نفس و شهامت دشمنی جام اولدی جام
لاجرم عقل و فراست دشمنی جام اولدی جام
اهل شربه توسن عقل اولمیوب دنیاده رام
ایستیه شربین بشر تعظیم تحریمین بوله
دلده آب آتشینین ، جسم تضریمین بوله
بسدی حد آخری و نفس تکریمین بوله
قتلدور دوردیمجی حد ، ایستر خواص ایستر عوام
ذیحق اولسون بیربیرینه اهل فقر و اغنیا
با اهمیت زکات آیاتی گتدی مصطفا
ایلدی تامین مالی اهل دینه مطلقا
چوخ ایدوب تاکید اولونسون هر زکاته اهتمام
گر زکاتین رد ایده هر بیر غنی ، ئیلدن ئیله
آند اولا اسلامه هیچ بیر گوز ساتاشماز سائله
هر فقیر و هر غنی دلدن ویرللر ال اله
رخنه گورمز ملک و ملت بیر خداوند مقام
حکمتیله چوخ بیر احکامی حکیم بی نیاز
هر نماز واجبیده جمع ایدوب ای اهل راز
معصیتدن ساخلار اوز اهلین ، نماز اولسا نماز
هیکل دیندور حقیقتلی قعودیله قیام
پربها بیر گوهر بی مثلدور دین مبین
دینه قربان جان و مال انبیا و مرسلین
انبیا قربانی ، جان و مال و نفس اهل دین
گور نه قیمت دینینه قویموش خدای ذوالکرام
بی سبب قربان دگل دینه وجود مصطفا
بی جهت محرابده قانه بویانموب مرتضی
بی جهت بیر عمر ، هر بیر رنجه دوزموب مجتبا
بی جهت دشت بلایاده حسین ایتموب قیام
نور عمرین مصطفی دین اوسته خاموش ایلدی
مرتضا دین اوسته دنیانی فراموش ایلدی
دین یولوندا مجتبا زهر جفا نوش ایلدی
دین یولوندا ویردی جان لب تشنه شاه مستظام
دین اسلام اوسته جان ویردی حسین بن علی
یازدی قانی صفحه ایجاده با خط جلی
قویمادیم یخسون لوای دینی اهل کفر الی
پرچم حق آچدیم اهل حق باشی اوسته مدام
دین یولوندا باغرینا عباس باسمشدی علم
دین یولوندا ظلم الیله اللری اولدی قلم
گورمدون انی احامی سسلنوردی دمبدم
پیکرینده باش باشا چاتمیشدی سانسیز چوخ حسام
دینه باخ بیر عزت بی منتهایه سیر ایله
دون ذات فرد فوق ماسوایه سیر ایله
شان اهل دینه باخ ، لطف خدایه سیر ایله
اهل دینیندور هامی شان و شرف ، هر احتشام
هر سعادت هر کسه اولسا هدف ، وار دین ده
ایستیه هر کیم هر عزت هر شرف ، وار دین ده
آختارار هر کیمسه هر در صدف ، وار دین ده
دین دور گنجینه هرگونه گوهر ، والسلام
حفظ استقلال ملیت بو دینه بسته دور
کسب و تحصیلات حیثیت بو دینه بسته دور
هر عدالت جمله حریت ، بو دینه بسته دور
دین یعنی حافظ حیثیت اهل سلام
(ذهنیا) بیر طرزیله بیر شعر انشاد ایلدون
نکته شعره کمالات اهلین ارشاد ایلدون
جنت اعلاده (ذهنی) روحینی شاد ایلدون
صورت شعرونده تاپدی معنی خیر ، اختتام.
مرحوم ذهنی زاده
بوگونده حقیدن امراولدی شاه بطحایه
که اوزنبوتیوی ظاهرایله دنیایه
بیله یازولا که اوچ میل مکه ده بیرکوه
دیوبله روزازلدن حرا او ماوایه
گلردی احمد مختاراکثراوقات
عبادت ایتماقا درگاه حی یکتایه
گلوب مطابق معمول او یرده اگلشدی
همانکه گونده یتوب وحی حق او مولایه
مراجعتده ایشتدی بو سس گلورناگاه
دیورکه حمداولا درگاه حی اعلایه
که سن رسول خداسن منیم آدیم جبریل
سنه خدا طرفیندن گتورموشم آیه
خدادن امر اولونوب ای محمد عربی
که خلقی دعوت ایله دین حق کبرایه
پیمبرین بدنی اضطرابیله دولدی
ایشتدی ملتفت اولدی همین بو معنایه
اوزینده حس ایلدی قدرت نبوتینی
اودورسرور ویروب یوزاو شاه طاهایه
مراجعت ایلیوب منزله شه بطحا
او اضطرابیله داخل اولوبدی ماوایه
خانم خدیجیه احوالینی بیان ایلدی
او سره محرمی حالی ایدوب قضایایه
خدیجه چون او شهین صدق قول و رفتارین
بولوردی علقه یتورموشدی میر بطحایه
دوروبدی گلدی عموسی ورقه نین یانینا
اونون بلوردی که وارعلمی بیحد و پایه
قضیه نی دیدی ویردی جواب اونا ورقه
محمدین یتوشوبدورمقامی بالایه
بو جبرئیل هماندور که طورسیناده
گتوردی وحی خدادن او وقتده موسایه
بودور پیمبر اکرم رسول عالمیان
بونون فضیلتی وارانبیا و عیسایه
خدیجه نین چوخالوبدوربو سوزده ایمانی
قیتدی بیعت ایدوبدوررسول والایه
گلوبدی کعبیه اول پیمبراکرم
دوشوب بو فکره ویره دین حقه پیرایه
ازل خدانین ایوین یدی دفعه ایتدی طواف
قویوبدی حکم خدانی او گوندن اجرایه
ایدوبدی دینه ازل اوزقبیله سین دعوت
قریش طایفه سی یتدی اجرعظمایه
قوتاردی خلقی جهالتدن ایلدی عالم
جهانی لرزیه دولدوردی باخ تجلایه
هزار حیف بو زحمتلرین مقابلینه
سالوبلا گورنقدرمحنت و بلایایه
ووروبلا سنگ جفا سجده گاهی چاک اولدی
دوزوب نقدریتوب حق یولوندا ایذایه
بویرده یادیمه سلطان کربلا دوشدی
یوزوم دولاندی گینه اول بلالی صحرایه
حسینه ارث قالوب باش یاراسی جدیندن
نچونکه رتبه ده وارثدی جدی طاهایه
گواه دور بو سوزیمده زیارت وارث
ایشقلی گون کیمی واضحدی پیرو برنایه
اوخورسان اوردا که یا وارث خلیل الله
ایدراشاره او داش یاره سی بو معنایه
دوشوبدی درگهوه یا حسین دخیل(اشکی)
سن ایسته حق اونا ویرسون بیرعالی سرمایه
حاج مجید اشکی تبریزی
جمالون آیتِ نور خدا دور یا رسول الله
مقالون صحبتِ ربُّ العَلادوریارسول الله
سنون اوصافوی یازسون قلم عاجزدی شرحیندن
خلایق دن بو قدرت چون جدا دور یا رسول الله
ائدوبدور خالق عالم سنیله خلقتین تکمیل
بو خلقت خلقته معجز نما دور یا رسول الله
صفای عالم امکان سنه وابسته دور شاها
بو عالم خلقتونله با صفادور یا رسول الله
کرامت ده سخاوت ده سنه یئتمز بو روشن دی
کی حاتم لر قاپوندا بیر گدا دور یا رسول الله
رسالت چرخینه بیر آفتاب عالم آرا سن
وجودون آسمانه انجلادور یا رسول الله
مقام و مرتبت ده شانیوه چاتماز بیری مطلق
طفیلی درگهونده انبیا دور یا رسول الله
گتوردون اِقرَء بِاسمَه آیه سین خلاق داوردن
آدونلا اهل قرآن آشنا دور یا رسول الله
بولنمز شانیوی بیر کس سنون بو دار دنیاده
بو شاءنه آشنا بیر مرتضا دور یا رسول الله
شب مبعث دی "دلجو" یازدی بو شعری بو امّیده
اورکده حاجتی بیر کربلا دور یا رسول الله
چکوب انسانی تصویره تعالی دست رحمانی
نبی اکرمیله حق اوجالدیب شان انسانی
بشر مدیون الطاف نبی الله اعظمدور
جهان اهلی فدا اولسا بو فدیه شانینه کمدور
ازلدور خلقتی اما رسول الله خاتمدور
گلوب تا ایلیه اجرا جهاندا متن قرانی
جمالی جلوه جنت وجودی شمس وحدتدی
بودور نور حقه ملجا دلیل خلق خلقتدی
اولوب معنای جاء الحق سراسر نور و رحمتدی
جمالی گورسدور یئرده گوزل سیمای جانانی
آچیلدی باب فضل الله فضیلت گلدی دنیایه
روادی لیلی عالم اولا مجنون بو لیلایه
بهشت ایچره ملائکلر دییور تبریک زهرایه
بو مولوده جهان اهلی روادی اولسا قربانی
خجالتدن نقاب آلمیش یوزه خورشید نورافکن
جمالون تا گوروب گوللر سولوب گلزار و هم گلشن
گورن سویلور فقط یکسر رخ پیغمبره احسن
عجب خلق ایلیوب الحق ید حق بیله سلطانی
جهانی دولدوروب نوری بیله انواره عشق اولسون
قدوم پاکینه قربان گوزل دلداره عشق اولسون
یوزی گلزار جنتدی گل و گلزاره عشق اولسون
اولوبدور ظلمته چیره منور شمس تابانی
گلوب پابوسینه گویدن ملائکلر هامی یکسر
آلوب عشاق عالمدن توان بو نازنین دلبر
آدون ایلوب نشاطیله تمام انبیا ازبر
اولوب جبریل دربانی غلامی ماه کنعانی
گوی اهلی سسلوری احمد آدون ذوقیله گویلرده
محمد آدینی سسلور بنی آدم ده یئرلرده
صفا اهلی صفا تاپمیش نمایان عشقی دللرده
تحیرده قویوب مهری تماما جمله خوبانی
یاپیشسان (( طائرا )) دلدن اگر دامان احمد دن
همیشه مدحتون یازسان بو شاهنشاه سرمددن
سنی سرشار ائدر لطفی همانا لطف بی حددن
خلوص نیتون اولسا گوررسن بذل شاهانی
مبعوث اولوب پیغمبر خاتم بو گونده
ایلر تفاخر آدم و عالم بو گونده
چون گیچدی قرخ ایل سن ختم انبیادن
روح الامین فرمان گتوردی کبریادن
دور یا محمد باک ایتمه اشقیادن
سنسن تمام عالمه اقدم بو گونده
مبعوث ایدوب رسالته خلاق یکتا
اظهار ایله بلسون بو امری اهل دنیا
ای سید عالم شه بی مثل و همتا
سنله بنای دین اولوب محکم بو گونده
سنله تاپار دین خدا رونق جهاندا
محبوب حق سنسن نبی اخر زماندا
حکم خدا اجرا اولور سنله هر آندا
ایلوب وجودین عالمی خرم بو گونده
سنسن سبب ایجادینه دار فنانین
وار لطف مخصوصی سنه هر دم خدانین
تاج سری سنسن تمام انبیانین
مبعوث اولدون جمله دن خاتم بو گونده
سنسن که خلقی ایلسن دائم هدایت
اولموش وجودین خلق ایچون اسباب رحمت
آخر چکرسن امت استه چوخلی زحمت
حالین مجسمدور شها هر دم بو گونده
مرحوم ذاکر تبریزی
چون گیچدی قرخ ایل عمر رسول انامیدن
فرمان گتوردی روح الامین لا ینامیدن
ای ذات پاکی علت ایجاد ممکنات
وی مرشد طریقت حق باعث نجات
ای نازنین وجودی اولان علت وجود
خلق ایتدی خلقی سندن اوتور خالق ودود
سنسن که خلقتونده شها بینطیر سن
سنسن حبیب حق شرف مرسلین سن
دور فاش راز قیل که منی ای شه انام
مبعوث ایدوب رسالته خلاق لاینام
دور ای حبیب حق هامی دنیانی شاد ایله
مخلوق ایچنده نام خداوندی یاد ایله
ذکر ایله نام حصرت معبودیوی بلند
گر خصمیدن یتوشسه سنه صدمه و گزند
اجر جزیل خالق یکتا ویرر سنه
کون و مکاندا عزت عظما ویرر سنه
الدی لوای حمدی اله اشرف رسل
حمد خدایه آچدی دلین هادی سبل
ذکر ایتدی اسم پاک حق لاینامیدن
مبعوث اولوب آیردی حلالی حرامیدن
گلدی خدیجه منزلینه نور لم یزل
بیر جامه ایستدی که ایده خواب ما حصل
یا ایها المدثر اولوب نازل اول زمان
دور ذاکر اول خدانین آدین خلقه قیل بیان
ابلاغ ایله الله آدین اوز نبوتون
اولسون تمام عالمیانه هدایتون
الحق نقدری چکدی بو امت اذیتین
یاخشی جهاندا ساخلادیلار پاس حرمتین
مرحوم ذاکر تبریزی
غریبه گوندی بوگون وار جلالت و شانی
همین جلالتی شاد ایلیوب مسلمانی
بو گونده یتدی حضورِ پیمبره جبریل
مقام ، اوندا که ایتموشدی کوه حرّانی
گوروب نزول ایلدی جرئیل و میکائیل
ازل یتوردی سلامِ خدای یکتانی
ملک یمین و یسارینده واردی یتمش مین
گلوب زیارت ایده اول مقام عُلیانی
اودمده قویدولا، یاقوتیدن یره بیرتخت
ایدوبله ساکن اوبیر تخت اُسته طاهانی
قویوبدی باشینا تاج رسالتی جبریل
اومه جمالی اولوبدور علاوه نورانی
ایدوب او حضرته تعلیم ، سوره اقرء
بیانه گتدی هامی لفظ کلِّ معنانی
دیدی رسالتوی امر حقدی ،خلقه یتور
بویوک کیچیک هامی بولسون بو شرع قرآنی
عروج ایدوب گویه جبریل و هم ملائکلر
ایدوب بو حکمته دارا ،هر علمه دارانی
لوای حمد، النده او حامد ازلی
ایدردی حمد و ثنای خدای اعلانی
مراجعت ایلدی مکّه معظّمیه
خدیجه منزلینه گلدی ،میر ربّانی
اودم پیمبره هر بیر جماد ،ویردی سلام
رسول حق،بولوبدور او شاهِ والانی
باخان زماندا خدیجه پیمبرین یوزینه
جمال پاکنون اولدی اودمده حیرانی
دیدی خدیجه سوله ،لا اله الا الله
رسول اکرمه حق امر ایدوب بوفرمانی
دیدی بولوردوم ازلدن فداک امّ ابی
خدا سنه ویره جاق بو مقام علیانی
ویروبدی نچّه خبر جبرئیل عالمده
ایدوم بیان سوزومی گرچه اولدی طولانی
بیری رسالتیدی ذکر اولوندی جابرجا
ویروب، بیرده خبر میلاد شاه عطشانی
ویرنده بوخبری اولدی عالمین دلی شاد
امان اوچومچی خبردن کسر توانانی
او ساعتیکه علی باشینی قلجلادیلار
بویاندی قانه نماز اُسته اول وفا کانی
بو ذکری بیرده دیدی کربلاده جبرائیل
اودمکه یخدیلار آتدان عزیز زهرانی
جدا باشیندا دیوب راس شاه دین تکبیر
شهادت امرینون اولدی جداده اعلانی
ایشتدی بوسسی چون خیمه ده امام علیل
بو غم بو غصّه گلوگیر ایدوب اونالانی
بیوردی عمّه کنار ایله خیمه دامانین
گوروم قتالیده کی، هایهوی و غوغانی
بابام اُلوب دیه سن ایلوری ندا جبریل
نزول ایدوبدی ملائک دوتوب بیابانی
خیام پرده سینی زینب ایلینده کنار
ایدوب مشاهده بو وقعه ی غم افزانی
نه گوردی شمس هدایت دوتوب جداده قرار
رواندی پای جدایه بوغازینون قانی
دیدی ای عمه اسیر اولماقوز یقین اولدی
گل ایت بو امریدن آگه بنات و نسوانی
اسیر اولماقا بیل باغلاسون مخدّره لر
یتیشدی دلده کی مقصوده قوم سفیانی
هنوز اوّلِ مطلبدی وورما غارته ال
تمام ایله گینه (حامدا) بو عنوانی
مرحوم حامد تبریزی
یا محمّد طلعتوندن خلق دنیا مست اولار
عطر زلفوندن یقین جنّتده حورا مست اولار
خطّ محراب جبینوندن شاخاندا نورعشق
ساکنان نُه رواق و عرش اعلا مست اولار
ذکر و تسبیحون طنین انداز اولاندا غاریده
خلوت طور مناجاتینده موسی مست اولار
مژده کوثر ویرن ساعت سنه روح الامین
بوالبشرحیران قالار روح مسیحا مست اولار
گورسه بیریول گوزلرونده معنویت جذبه سین
حُسن یوسفدن دویار فوراً زلیخا مست اولار
محضرونده تا سَرِ تعظیم اَیَر فوج ملک
ساقی فردوس اعلا الده مینا مست اولار
چگنوَه بوسه وراندا نَیًر زرین قبا
انبیای ماسَلَف ایلر تماشا مست اولار
قبلیه ساری دوراندا سن سَرِ سَجّاده ده
گللره زَوّار اولان شَبنمده حتّی مست اولار
سیفی اردبیلی
امر خالق لایزالیله حکمت ایلدی اقتضا بو گون
صاحب اولدی تاج نبوّته فرق خاتم انبیا بو گون
امر اولوندی دربار قدسیدن نازل اولدی روح الامین یره
فوج فوج علاوه نزول ایدوب ساکنان عرش برین یره
شامل ایلدی فیض کاملین خالق سما و زمین یره
ایلسون حبیبی مشاهده لطف ربّینی برملا بو گون
اِقرا بِاسم رَبِّک دیدی دوتوب جبرئیل بازوی احمدی
ایلدی احاطه او حضرتی رحمت خداوند سرمدی
سالدی گون کیمی عالمه ضیا جلوه ی جمال محمّدی
شرم ایدوب او نورین مقابلی گون سالا یر اوسته ضیا بو گون
برگزیده ی ربُّ العالمین صاحب اولدی تاج نبوّته
عزم ایدوب حرادن حبیب حق دودمان پاک رسالته
هر گیاه و سنگه ایدوب گذر ایلدی سلام عرض او حضرته
بیر به بیر جوابین ایدوب ادا تاجدارِ قُل اِنَّما بو گون
منزله یتیشدی خدیجه چون باخدی بیر او زیبای شاهده
صورتونده عرض ایتدی ایلورم اوزگه بیر تجلّی مشاهده
ایلدی بیان ختم الانبیا قالماسون خانم اشتباهیده
بو نبوّتین نوریدور منه ایلیوبدی خالق عطا بو گون
امر ایدوب جناب خدیجیه ذاتِ حقّه ویردی شهادتِین
ایلدی قبول اشتیاقیله خاتم النّبیّین رسالتین
درک قیلدی بو افتخاریله هر ایکی جهانین سعادتین
تاپدی غمدن افسرده خاطری بو سعادتیله صفا بو گون
چولقیوب وجود مقدّسین بیر عبایه پیغمبر خدا
خواب نازه مشغول اولان کیمی گَلدی جبرئیل ایلدی ندا
ای اوزینی پیچیده ایلین، دور ایاقه ویر عالمه صَلا
اهل کفری قورخود عذابیدن، قیل حقیقته آشنا بو گون
دوردی تا یریندن رسول حق امر حقّه ایتدی متابعت
کائناته تکبیریله سالوب لرزه حضرت ختمی مرتبت
یتدی جمله موجوده بو صدا ایتدی بو کلامه موافقت
اوز دلینجه هر بیر گروه ایدوب امتثال امر خدا بو گون
اولماسیدی مبعوث او شاه دین گر بو گون که گونده نبوّته
حشره تک گلن نسل لر یقین تک به تک دوشردی ضلالته
بیر نفر تاپولمازدی ایلسون بیر علاج درد جهالته
ایلدی رسول خدا همان درد بی دوایه دوا بو گون
بیر ایله زماندا که عالمی کفر ظلمتی ایلمیشدی تار
قتل و غارتی ایلمیشدیلر اوزلرینه اعراب او گون شعار
هر کس اوز الیله درست ایدن بیر بتیله ایلردی افتخار
اولدی شاهراه حقیقته رهنما او نور هدی بو گون
بیر یره یتیشمیشدی مکّه ده قان توکن او قومین جنایتی
زنده زنده قبره قویاردیلار قیزلارین قریشین جماعتی
ایلدی برانگیخته خدا بیر ایله زماندا او حضرتی
خاتمه ویره جاهلیّت و کفره خاتم الانبیا بو گون
مکّه ده اوچ ایل خفیتاً ایدوب خلقی حقّه دعوت او مقتدا
اولدی اوّل ایمان قبول ایدن بیر خدیجه بیر شاه اولیا
وقت او وقت اولوب آشکار ایده دعوتین او سرخیل انبیا
اولدی جلوه گر نور دین حق ماسِواللهه ابتدا بو گون
گتدی بیته تشریف او نور حق بیر اوجا سسیله ایدوب خطاب
ای گروه اعراب ای قریش کیمده وار عذاب خدایه تاب
بت پرستلیقدان سیز ال چکون ایتمیون بیله کار ناصواب
سیزدن ایلینمز بو بتلروز هیچگونه دفع بلا بو گون
کعبه دن بو بتلر که آسمیسوز بیر ایش اللریندن گلن دگل
امر و نهی ایدنمز مجسّمه، وهن دور بو بیت معظّمه
اعتقاد ایدوب یوخدان عالمی خلق ایدن خداوند عالمه
قدرتینده واردور بیر آنیده ایلسون جهانی فنا بو گون
سیز گلون شهادت ویرون ازل بیر یگانه خلّاق اکبره
بیرده که اجابت ایدون منی عذر قالماسون روز محشره
من او ذات حقّین رسولیم ایتمیون اذیّت پیمبره
باور ایلیون برگزیدیه کبریا دانیشماز هوا بو گون
اول امین و صادق پیمبره کذب نسبتین ویردی قوم دون
ایتمیوب کفایت بو نسبته عقل کلّه نسبت ویروب جنون
سنگسار ایدوبلر او حضرتی، پارچالاندی آنّی آخوبدی خون
اولدی اهل دینه او حالتی موجب فغان و نوا بو گون
بوینونا سالوب اوز عباسینی که سوروردولر یردن اهل کین
گاه باشینه کول توکوردولر، زیر پایینه خار مشرکین
صبر ایدردی دین اوسته هر غمه ایلمزدی شکوه او شاه دین
دوشدی یادیمه صبریله اُلن جدّی تک شه کربلا بو گون
فتلگهده آلمیشدی دوره سین اللرینه داش نیزه اوخ گلن
یاره اوسته یاره ووروردولار قصد قربتیله گلوب گیدن
فکر ایله او سانسیز یارائیله گور دوشر نه حاله او گل بدن
وار یری حسینین او حالینه آخسا دیده لردن دِما بو گون
ایلدی او کثرتده شاه دین قان ایچینده بیر وحدت اختیار
قویدی سجدیه مه جبینینی عرض قیلدی ای حیّ کردگار
راضیم یولوندا سنون منه هر نه ظلم ایده قوم نابکار
گلمرم دله ایتمرم گله ویرمیشوم قضایه رضا بو گون
ایلدیم ازل گونده ایتدیقیم عهدیمه بو صحراده من وفا
شدّت ایلدوقجا بلا دیدیم دمبدم لَکَ الحَمدُ وَالثَّنا
سنده شیعه لر معصیتلرین عفو قیل بو احوالیمه خدا
یا حسین دیوب صدقیله منه ایل به ایل دوتالّار عزا بو گون
اوغلون اکبرین جانینه سنی آند ویرّم ای شاه کربلا
ایسته بیرده «صحّافی» قبریوه عهدینه او یرده ایده وفا
گاه اکبره گاه اصغره گه دوتا علمداریوه عزا
عرض ایده خدا شکر اولا سنه اولدی نیّتیم جابجا بو گون
مرحوم صحّاف تبریزی
بیر نوریله منور ایدوبور بو عالمی
ممتاز خلق ایدوب اونی خلاق لا یزال
خلق ایلیوبدی خالق اونی پیشوای خلق
مخلوقی خلق حسنیله ایتسون فرشته حال
نور هدا و شمس ضحی اشرف رسل
نورانی ایلیوب بو جهانی او خوش خصال
زینت ویروب قدوم شریفی بو عالمه
دنیانی ایلیوبدی مزین او مه جمال
گر اولماسیدی اول خلقتده خلق او نور
ایجاد خلق اولوردی یقین ایلیون محال
اول بو نور خلق اولونوب صورا ما خلق
آخر زمان ظهورین اگر ایلسن خیال
خالق حکیمدوراوزی ایلوب بو حکمتی
حکمتدن اولمیوب ایله بیر کیمسنه زوال
گون تک بو نوری پردده مستور ایدوبدی حق
تا یتمسون شریعته هر دورده خلال
ابلوب او نور جودیله آخر زمان ظهور
سالدی قدوم اطیبی ادیانه قیل و قالوب کمال
ایندی مزین عالمی نور مبارکی
نشو نما ایدوبدی بو دنیاده ماه و سال
أز مدتی نقدر بلالر چکوب او شه
بو شرع انور استه اونا یتدی وخ ملال
ویردی رواج دین منیره او شاه دین
گون تک شریعتین گونی اوندان تاپ
قویدی اودمبنای غروب افتاب دین
قالموب او قدر تا اولا بو دین پایمال
رونق ویروبدی فانیله اسلامه تازه دن
تعجبل ابدوب امام حسین ویرمدی مجال
ویدی فدا جوانلارینی شرع انوره
جدی حرام ایدنلری تا اولماسون حلال
قارداشلاریندان ال چکوب اوخلاندی اصغری
بلمم او حالیده او شهه یوز ویروب نه حال
دوغراندی یار و یاوری ناحق او دشتیده
رنگین ایدوبدی یکسر او صحرانی خون ال
(زایر) بو سروره شب و روز اغلا نوحه یاز
وار چوخ گناه سنده اوزین بو کمنده سال
مرحوم زایر تبریزی
بو گونده اولدی عیان نور احمد محمود
منور ایلدی أفاقی اول مه انور
ربیع الاولین اون یدیسی دوشنبه گونی
قدم بو عالمه قویدی او فخر جن و بشر
بو گونده طاق انو شیروان شکست اولدی
بنای کنگره باطل اولدی زیر و زبر
نظامی لات و مناتین بو گونده برهم اولوب
ایدوب بو واقعه چوخ بت پرسلری مظطر
ایدوب منادی غیبی ندای جائا لحق
اولوبدی باطل عدم گلدی حق پیغمبر
حق ایستدی بو نیله انبیا نی ختم ایتسون
بشارتیدی بونا اول کلن پیمبر لر
بو فخر عالم ابداع علت ایجاد
بونون وجو دینه تشکیل تا پدی عالملر
ایدوبدی عرش خدا رشک سطح غبرایه
مشرف اولدو لا پا بوسینه ملا ئکلر
بونیله دینینی تکمیل ایدوبدی رب جلیل
اولوب بو دینیله منسوخ تمام مذ هبلر
أچیلدی باب هدایت تمام خاق اوزینه
اولوبدی رهبر أئین خالق اکبر
ویروبدی دین خداونده گون بگون ترویج
هدایتین گونی دوتدی جهانی سر تا سر
یتنده قرخ یاشا اولدی هدایته مبعوث
گلوبدی تهنیته اهل نه سما یکسر
عربده رسمیدی سنی جهاندا قرخ اولانین
سوزین حسابه قویالار ویررنتیجه اثر
اودور رسا لتینی قرخ اولاندا ظاهر ایدوب
پیمبریدی ازلدن ولی بو فخر بشر
ایدردی بیر به بیر احکام دینی خلقه بیان
دیماقا حق سوزینی قو یمادی منافقلر
یالانچی ساحرو کذاب أدیله سسلدیلر
توکردی باشینه کول طعن ایدردی دشمنلر
اودور زمانه ده ما اوذی نبی دیدی
تحمل ایتدی یتوب هر قدر جفا و کدر
ووروبلا سنگ جفا پارچالاندی سجده گهی
أخوبدی قرمزی قان ایتدی گل یوزین احمر
همین بو قومیدن اشرار کوفه مشق ألدی
حسینین أنینا داش ووردی کونه سالدی شرر
بحق خون حسین رحم قیل بو زاره خدا
بو حالیله اله کیم (حامده)حمایت ایدر
مرحوم حامد تبریزی
جهت دسترسی به مطالب بیشتر درباره عید مبعث «ویژه نامه مبعث پیامبر رحمت» را مشاهده نمایید.
مطالب مرتبط
