تکلیک - بختیار وهاب زاده
خیال گاه داغدادیر، گاه دا آراندا،
گاه گؤیه یۆکسلیر، گاه ائنیر اینسان.
اوتاقدا بیر ساعت تک اوتوراندا،
یۆز ایلین دردی یله یۆکلنیر اینسان.
ائله بیل دیوارلار گلیر اۆستونه،
قولاغین سسلنیر، قلبین دؤیونور.
آلیشیب یانیرسان سن اؤز تۆستونه،
نیدالار گؤزونده سوالا دؤنور.
اینسانی تئز یورار دۆشونجه لر ده،
وئریب نفسینی درد اودار اینسان.
اؤزوندن باشقاسی اولمایان یئرده،
اینسان اولدوغونو اونودار اینسان...
بیر گۆنش بس ائدر، پریشان اولما،
سنین یۆز کۆر قدر گؤز یاشین اولسا.
مین درد هۆجوم ائتسه، کؤنول، سؽخیلما،
بیر نفر درد بیلن سیرداشین اولسا.
دۆنیایا گلمه دیک بیز عبث یئره،
اینسانیق، اینسان دا بیزه گرکدیر.
باغاتک قؽنینا چکیلنلره
اۆرک نه گرکدیر، دیل نه گرکدیر.
چای چایا قوووشماز سولار داشماسا،
اولدوزون اولدوزلا اۆنسیّتی وار.
گؤیده بولودلار دا قوشالاشماسا
نه ایلدیریم چاخار، نه یاغیش یاغار...
یول تاپا بیلرمی ساز اۆرکلره،
میزراب آستا-آستا تئله دگمه سه؟
چؽخارمی قؤنچه دن تک بیرجه کره،
بۆلبولون نفسی گۆله دگمه سه؟
اؤز ائل-اوباسینی ترک ائتدیگیندن،
تک-تنها دولانیر بایقوش بو گۆن ده.
کوللارین دیبینده تک بیتدیگیندن،
بوینو بۆکوک اولور بنؤوشه نین ده.
اود وورماسا، قابدا سو داشا بیلمز،
قوش دا تک قانادلا داغ آشا بیلمز.
کؤسؤیون ایکیسی چؤلده ده یانار،
بیری اوجاقدا دا آلیشا بیلمز.
قلبیمده مین سؤزوم، مین صؤحبتیم وار،
من دئییم، سیز دئیین، دیل یورولماسین.
یؽغیلین، یؽغیلین باشیما، دوستلار،
منیم بیر گۆنوم ده سیزسیز اولماسین.
دوستلارین قلبیدیر یوردوم، مسکنیم،
اۆرکده بیر نیسگیل گرک اولماسین.
ساغلیغیم بیر یانا، آ دوستلار، منیم؛
سویوق مزاریم دا هئچ تک اولماسین!
