اۆچونجو گؤز - کؤنول گؤزو - بختیار وهاب زاده
گؤی اۆزو دامار-دامار،
گؤیدن یئره نور دامار.
ها باخدیم گؤی اۆزونه،
نورو گؤره بیلمه دیم.
«گؤزلریمین ایشیغی بلکه آزالمیش»، - دئدیم،
خالق حیکمتی هئچ زامان یانلیش اولامماز دئیه
بیر داها باخدیم گؤیه.
گؤردوم، وؽزیلتیلارلا اوچان بیر آناش آری
قوندو گۆل لچگی نه.
دۆشوندوم: «بو آری نین مرامی نه، قصدی نه؟»
قؽزیل گۆل دیله گلدی
(یا منه ائله گلدی):
«گؤیدن ائنن او نورو گؤره بیلمکچون سنه
اۆچونجو گؤز گرکدیر،
گؤیدن ائنن نور سئلی یئرده چیچک-چیچکدیر،
گؤزللیکلر اؤنونده بو آن حئیرتده یم من.
چؽخماق دا مۆمکون دئییل، گؤردویوم گؤزللیگین
سیرلی جاذیبه سیندن.
گؤزللیگه حئیرتیم باشقا گؤز وئردی منه،
گؤرمه دیگیم نورو دا او گؤز گؤستردی منه،
آنلادیم، اۆچونجو گؤز منیم کؤنول گؤزومدور.
او گؤز ایله باخاندا گئجه ده گۆندوزومدور،
او گؤز ایله باخاندا من یالنیز اۆزو دئییل،
هم ده اؤزو گؤرورم.
بیره باخیب او بیرین آرخاسیندا گیزلنن
اونو، یۆزو گؤرورم.
او گؤز ایله باخاندا داشدا دا، تورپاقدا دا،
اوتدا دا، یارپاقدا دا،
دۆزنده ده، داغدا دا،
قارادا دا، آغدا دا
من اؤزه یی گؤرورم.
بو گۆنه باخماق ایله گله جگی گؤرورم.
او گؤز ایله باخاندا، بیر گیزلی سیرّ گؤرورم.
هله میصراعلانمامیش نغمه، شئعر گؤرورم.
بیر نغمه دیر، شئعردیر بو دۆنیا باشدان-باشا
کؤنول گؤزویله باخسان.
کؤنول گؤزون یوخدوسا، بو حیکمتدن اوزاقسان.
