شعر ترکی حضرت علی اصغر از رحیم منزوی اردبیلی
شعر ترکی حضرت علی اصغر علیه السلام از رحیم منزوی اردبیلی
من ئوزم خجالتم سن ايلمه اشاره اصغر
ئولوم ايستورم ايدنده یوزووه نظاره اصغر
سینا گر گلابدانون جالانا یره گلابی
قوری شیشه دن کسیلمز برکات عطر نابی
قوریان دوداقون از بس عطش ایلیوب ربابی
اوره گيم شراری سونمور ئوپورم دوباره اصغر
قطرات پاک شبنم دوزلر نئجه گل اوسته
آخنار گول اوندا ايستر ایده تکیه سنبل اوسته
پوزولا گورنده بلبل اونی ثبت ایدر دل اوسته
قنادین چالار او شبنم دوزولن عذاره اصغر
گورورم بو گول یوزونده دوزولوب سنونده شبنم
قاریشور او شبنمیلن گوزوین سرشگی نم نم
هاچانا کیمین زبانه چکه جک الولی سینم
نه بو دوشلرینده سو وار نه الیمده چاره اصغر
نئجه که خلیلون اوغلی یره وردی ئوز ایاقین
ید قدرت ایتدی جاری اونا زمزنون بولاقین
ال ایاق چال ایندی زمزم گوره تشنه لب قوناقین
گله جوشه دوشلریمدن آخا آشکاره اصغر
نئچه آی دیدی بو داغی داشی دربدر دولانام
دیل آچینجا ئیلکی اوغلوم هله چولده دالدالانام
نه بلیدیم آلتی آيدا یوخودان هراس اویانام
امگیم هدر الیم بوش اوره گیمده یاره اصغر
دیمه بو فلک ربابون گلجک گونین بُولیمش
آنانون هامی امیدی بالا ئورگنن دلیمش
کیمه دردیمی دیسم من دیه جک یازون بلیمش
نه قضایه گوج چاتارمیش نه ده روزگاره اصغر
سنه خدمتيم به ایوده منه عالی منصب اولدی
بو سلیقه مندن اهل دله درس مکتب اولدی
بلگین آچوب بوکنده بالا اوخشاماق دب اولدی
ایده جک سنه توسل هامی بخت قاره اصغر
منی خلقتون بو سرٌی گتیرور اوغول خروشه
اوشاق اولمامیش گلور صود آنانون دوشینده جوشه
نه گوزلدی ئولجگینده قیدوب گیده بو توشه
داخی سالمیا داشان صود آنانی فشاره اصغر
ايله ناگرانم ایندی بو گونه گوره سحردن
چالشام ولی وجودین قوتارانمیام خطردن
او زمان دولا صودیلن دوشه دوشلریم نظردن
او دوا که درده دگمز آخا ریگزاره اصغر
نئجه (( منزوی )) تجلی گل ایدر گلاب آدیندان
نئجه نور فیض و رحمت یاغار آفتاب آدیندان
نه عزا که بزم عشرت پوزولار رباب آدیندان
گوز اگر قوتارسا اشگین گتورر دوباره اصغر
❖ ❖ ❖ ❖ ❖
شاعر: رحیم منزوی اردبیلی
افزودن دیدگاه جدید