شعر ترکی احوالات حضرت رقیه - رحیم منزوی اردبیلی
شعر ترکی احوالات حضرت رقیه سلام الله علیها - رحیم منزوی اردبیلی
قویوبلا چولده آی بابا آنام باجیم ملر منی
سالوبلا ئوزگه لر کیمین گوزیندن عمه لر منی
نئجه ئوزین ورار سودا ساقا صولا سنیق گمی
او حاله قالمیشام بابا گوزوم گورنده کولگمی
نه آی چخور نه کهکشان ایتورمشم دوشرگمی
اجل بهانه آختارور سراغ ایدوب گزر منی
قویوب گور ایندی بو گئجه فلک کیمیله باش باشا
بیر اوچ یاشندا قورخولی قزی سالوبدی داغ داشا
ایاق یارالی چاتمور ال نه باجیا نه قارداشا
من ئولمسمده ئولدورر مشقت سفر منی
بو آیدا چیخمور از قضا بیر آز ایشیقدا آغلیام
ایاقمون تیکانلارین چکوب جهانی داغلیام
آچوب بو کهنه معجری بولوب یارانی باغلیام
اورکده چوخدی طاقتیم ایاقیم اینجدر منی
ئوزوه مسند ایتموسن اوجادا نوک نیزه نی
ایاقون آلتدا گورموسن ایاقلانان ضعیفه نی
گوزوندن اشگ تک دوشن بالون گینه گزور سنی
یتش هرایه بوشلامور سیاهی خطر منی
غرض قضائیلن قدر سالوب اله بهانه نی
گئجیله زجر بی حیا تاپوپ او نازدانه نی
سلام وردی تتردی گورنده تازیانه نی
دیدی گوزتله ورما ای لعین فتنه گر منی
قلم الیمده ایستمور سوزی سوزه هدر قاتا
رقیه تک هوسلنور او کاروانه تئز چاتا
گیدور که تیر غمزه سین گوزیله نیزیه آتا
دیه دوشنده ناقه دن گوزتله مختصر منی
دینمرم نه لر چکوب بو کاروانه گلمشم
بو داشلقی تیکانلقی گلینجه جانه گلمیشم
فقط یارالی باشوی ایدوب بهانه گلمشم
دیدیم جداده سیر ایدن یارالی چوخ سویر منی
ئوزومی موج محنت و غم و بلایه ورمشام
گزوب تاننمیان یولی بو خسته جانی یورمشام
قوولمشام یخلمشام گئنه دوباره دورمشام
بو فکریلن که زجر دون یوبانسام ئولدورر منی
بیور دمشقه بو یولون نقدر وار مسافتی
اگر یوخوندی ویرمیوم بو کاروانه زحمتی
اوزاخدی تاپشور عمه مه دوباره بو امانتی
دی کوچ ایدنده ایلسون اققلی با خبر منی
تیکان باتوب ایاقمه گل آچدی بلبل آغلادی
دوزنمدی فراقوه یانوب شیرین دل آغلادی
اولوبدی فاطمه آنام دچار مشکل آغلادی
یتشدی باسدی باغرینا او زار دیده تر منی
دوشور منیم خیالمه وطنده کی مناظریم
قبیله قونشی تای توشوم مقابلیم مجاوریم
او عزتیم بو ذلتیم او اولیم بو آخریم
مدینه لی ئوپر منی بو کوفه لی دویر منی
مدینه ده دائی لاریم ایدنده خواهش عجزیله
ئوزوی راضی ایتمدون گئجه گیدم دائیم گیله
نئجه دوزرسن ایندی سن قزوون بابا دوشه چوله
حسینه سویگلی بولن ایاقلیوب گچر منی
آنام دیردی هی منه اوزاقه گیتمه گوز دیر
گوزیلن اوخلار آی بالا گوزل جمالی بد نظر
گوزل لیگون طراوتین خزانه ویردی قمچیلر
بو نیلی صورتیم داخی یتیمه بنزه در منی
رقیه جان ضریحوه رواقوه فدا اولوم
سپنمدیم مزاروه گوزوم یاشین دولوم دولوم
دیر همیشه ((منزوی )) او قبره دوشمدی یولوم
اقللی جان وئرن زمان سن ایله مفتخر منی
❖ ❖ ❖ ❖ ❖
شعر از رحیم منزوی اردبیلی
افزودن دیدگاه جدید