شعر ترکی آخرین لحظات امام حسین (ع) در قتلگاه-رحیم منزوی اردبیلی
حسین هَل من معینی سسلینده
وفا سیزلردن امداد ایستینده
دوشوب سس عالم ایجاده لبّیک
بالیقلار سسلنوب دریاده لبّیک
حسین لبیک لبیک
اَزل اولدی مجسّم روح آدم
قرا گیدی رسولان مکرّم
خلیل اللّه و اسماعیل با هم
وروب سس موسی و عیسی بن مریم
قیزل طشتده دیدی یحیاده لبیک
حسین لبیک لبیک
خروشان باد و آتش ، کوه و دریا
شتابان خضر و الیاس و نکیسا
عزیزیلن عُذیر و نوح و ضرقا
چلیپا و صلیب و خاچ و یأسا
الین اوپدی دیدی ترساده لبیک
حسین لبیک لبیک
پریشان یوسف و یعقوب کنعان
شعیبِ پیر و داوود و سلیمان
یَشوعا یوشع و شَمعون و عِمران
فِداکَ سسلنوب ناقوس و رُهبان
گلوب زنّارینن فریاده لبیک
حسین لبیک لبیک
آتاسی مرتضی و جدّی خاتم
حسن قارداشی گیدی جامه ی غم
بتولون قامتی خم غرق ماتم
خدیجه آسیه سارا و مریم
چاغوردی دایه سی لعیاده لبیک
حسین لبیک لبیک
ملکلر تاجی گوتدی باشلارینّان
سپوبلر قان یره گوز یاشلارینّان
حجازون چیخدی او داغ داشلارینّان
نوا گلدی بقیعون داشلارینّان
دیدی اوغلی ئولَن زهراده لبیک
حسین لبیک لبیک
پر آشدی گویده مرغان پرنده
مَلَشدی هی غزالان چرنده
بیابانّان گئچن ریگ رَوَنده
بولوتلاردان چیخان برق جهنده
دییردی نعره ی غرّاده لبیک
حسین لبیک لبیک
شهیدانِ حُنین و بدر یکسر
صداقت پیشه انصار پیمبر
جناب حمزه و عباس و جعفر
ویروب سس پیر کامل مالک اشتر
دیوبلر یثرب و بطحاده لبیک
حسین لبیک لبیک
گلوب موجه عراقون اشقیاسی
نوادن دولدی شاهون نینواسی
اَله گلدی حسینین مُدّعاسی
اوجالدی زَعفر جِنّین صداسی
وِروبلر سس سسه اثناده لبیک
حسین لبیک لبیک
اولوب لرزان عباده نعش اکبر
بلکدن اللرین رد اِتدی اصغر
بِشیکدن دوشدی اول طفل دلاور
کنار نهر علقمدن مکرّر
دیدی قولسوز یاتان سقّاده لبیک
حسین لبیک لبیک
دایانمِش عرصه ده سلطان واحد
آچوب آغوشینی مشهوده شاهد
باخاردی ساق صولا یالقوز مجاهد
او دم بیر نامه تقدیم اِتدی قاصد
آچوب گوردی یازوب صغراده لبیک
حسین لبیک لبیک
عجایب سس گلوب یردن سمادن
گِل و بَنّا و بانیدن بنادن
حرَمدن ، مَروه دن ، سعی و صفادن
حریم زمزم و خیف و منادن
اوجالدی دم به دم معناده لبیک
حسین لبیک لبیک
حضور یاریده اهل معانی
گرک وِرسون بصیرت امتحانی
حسین ایستر بیله رمز دعانی
دیمز اَرنی ، اِشیتمز لن ترانی
اونا سسلر حق یکتاده لبیک
حسین لبیک لبیک
وِرورسن جان اگر من جان ستانم
عیالون امن سیز اولسا امانم
کیمون وار خیمه ده من پاسبانم
بیلورسن که اوزونّن مهربانم
سن اول اوز عَهدوه آماده لبیک
حسین لبیک لبیک
توسّل وقتیدور فی اللّه، واللّه
دوش الآن سجدیه، صدقیله ای شاه
یوزون تپراقدا سسلن اللّه اللّه
مَلَکلر سسله سونلر وَفِّق اللّه
یازیلسون لوح عرش آراده لبیک
حسین لبیک لبیک
اگر چه امتحان وِردی خلیلیم
ولی سن سن ، خلیل بی بدیلیم
سنه قربان فرات و سلسبیلیم
سو ایسترسن گتیرسون جبرئیلیم
دیسین ساقیله هم میناده لبیک
یاناندا (( منزوی )) هر درد اَلینَّن
دوا گورمز بو خلقون سرد اَلینَّن
ایدَر دائم نوا نامرد اَلینَّن
توتار تک ( یحیوینین ) مرد اَلینَّن
دیَر اول شاعر استاده لبیک
حسین لبیک لبیک
❖ ❖ ❖ ❖ ❖
شعر از : رحیم منزوی اردبیلی
مطالب مرتبط
