اراسیندا - عاشیق علی عسگر

اراسیندا - عاشیق علی عسگر

تازا آشنالیغین، کهنه دوستلوغون
فرقی وار قیش‌ ایله یاز آراسیندا.
نامردده قایدادی کسر باسدیغین،
هرکس حساب چکسین ئوز آراسیندا.

قدرتدن اوجالان ظلم اینن انمز.
حقدن یانان چراغ باد اینن سونمز،
دوست دوستدان اینجیسه، قلبینن دونمز،
اولار بیرآز ارکیناز آراسیندا.

آدام وار آنلامیر دانیشیر سوزون.
ایچمه‌میش پییاندی، ایتیریب ئوزون،
بو عشوه و نازین، او قاش و گوزون
حرمتی وار، شئییتباز آراسیندا

علی‌عسگر، اولوبدو غم-محنت یوکوم.
فیل چکمز بو دردی من نجه چکیم؟
حق ایله ناحقی آختاران حاکم
تاپار قولاق ایله گوز آراسیندا.