اشعار ترکی عید مبعث - بخش دوم

اشعار ترکی عید مبعث - بخش دوم

در این بخش از ضیاءالصالحین، اشعار ترکی عید مبعث حضرت محمد مصطفی صلی الله علیه و آله و سلم را تقدیم دوستداران و محبین خاندان رسالت می نماییم. با ما همراه باشید.

« اشعار ترکی عید مبعث »

ای خاتم نبوّته مهر نگین اولان

گنجینه ی رسالته درّ ثمین اولان

نوری جمیع ماخلقَ‌اللهیدن ازل

دریای رحمت ایچره شرافت گزین اولان

ظاهرده ختم و معناده ماسبق

اصل وجودی اوّل و هم آخِرین اولان

رفرف سوارِ عرصه ی معراج اتّحاد

خاک قدومی زینت عرش برین اولان

دین مبینی ناسخ ادیان ماسَلَف

احکام شرع انوری حبلُ المتین اولان

لب تشنگان آب زلال هدایته

انگشت پاکی چشمه ی ماءِ مَعین اولان

دارالامان جنّ و بشر آستانه سی

خدّام خاک درگهی روحُ الامین اولان

شقّ القمر جلالون اوچون بیر نمونه دور

برهان آشکار و دلیل یقین اولان

کیمدور که انبیا آراسندا سنون کیمی

اسم شریفی رحمتُ للعالمین اولان

کیمدور یتوب دَنی فَتَدَلّی مقامینه

خلوت سرای قُربیده مَسند نشین اولان

سندن صورا بو رتبه لرین کیمدی صاحبی

ای لنگر سما و زمین و زمان اولان

کیمدور اونا خطاب لعمرک ایدوب اَله

قرآن حقّ ایچینده آدی یا و سین اولان

سن خلعت نبوّتیله سرفرازیدون

عنصر ایچینده آدمیدی ماءِ وطین اولان

سن سیر ایدنده عالم انواری بوالبشر

بیر مائیدی مشیمه ی خاک جنین اولان

مقصود سنسن اصلیده کلّاً ‌طفولیدور

عالمده تا قیامت اولونجا نگین اولان

اوصاف انبیا و صفوف مقرّبین

جاه و جلال خرمنینه خوشه چین اولان

ختم نبوّت اولماقا باعث بودور بلی

گیچمز قباقجا قافله سالار دین اولان

ایلر تمام عالم امکانه افتخار

سلمانیلن اباذره ده مستعین اولان

هر مجلسین جلالیدور اسم مبارکون

بیر نوریدور اورکلره بهجت قرین اولان

اولماز سنون شرافتیوین کیمسه منکری

اِلّا سرشت ذاتی خبیث و لعین اولان

سالموش اوزین کمنده دیر عبد روسیاه

غم گلشنینده «قمری» زار و حزین اولان

 مرحوم قمری دربندی

زینت یارادوب خلقته خلقتده محمد

تا رهبر اولا شهر شریعتده محمد

سیار صراط حق اولوب پایه به پایه

آهو کیمی دوشدی ئورگی دام خدایه

قانون خدا نازل اولوب آیه به آیه

حفظ ائتدی اونی پنجه همتده محمد

قلبین ائلدی وحی خداوند مکانی

گلدی یوزونه ذات حقون نور و نشانی

آی مثلی منور ائلدی غار حرانی

یوزدن یاییلان نوریله بعثتده محمد

تبدیل اولونوب غار حرا محفل عشقه

امر ائتدی خدا چک بشری ساحل عشقه

درمان سنی خلق ایلمیشم مشکل عشقه

تا قالمیا عشق اهلی ضلالتده محمد

بیر عصری کی اعرابی آلوب جهل و جهالت

جهلین آثراتی ائلیوب عالمی ظلمت

ناگه دل ظلمتده چیخوب شمس هدایت

تابنده اولوب گون کیمی ظلمتده محمد

گل لر گل آچوب ، بلبل ائدر نغمه ترنم

گلزار اسر یل ،‌ایلیر گل ده تکلم

تبریک دیور خنده کنان بیر بیره انجم

اگلشدی بو گون تخت نبوتده محمد

امواج کیمی فرشه طرف گوگدن انور نور

پروانه تک انواره آچوب پر ملک وحور

دنیانی دوتوب جشن وسرور وشعف وشور

معنانی قویوبدور یم حیرتده محمد

قوشلار پر زرین آچوب سیره هواده

تقدیس ائلیور پرلری پهنای فضاده

صنع ازلی صنعتیلن لوح طلاده

منقوش ائلیوب نقشه ی زینتده محمد

دنیانی دوتوب طنطنه لطف خدایی

ناسوته سرازیر اولونور نور سمایی

آی سان وئرور اولدوزلار ائدور جلوه نمایی

یل ثبت ائلیور جو طبیعتده محمد

لب لر متبسم اوتوروب یوزلره خنده

گوگلرده ملائک پر آچوب عین پرنده

یل شاخه ی طوبایه طرف هر دم اسنده

آهسته دیور یاپراقی جنتده محمد

عرش اهلی ملائکلن اولوب گوگده هم آوا

ایلولله محمد آدینا جمله سی ایمان

یکتا یاراداندا یارادوب خالق یکتا

هم صحبت وهم صورت وسیرتده محمد

عالمده نبوت اونا هر سری ائدوب فاش

چاتدی او یره زمزه ی عشاقه اولوب باش

تا محضر حقدن آلوب ئوز عشقینه پاداش

بیرفاطمه آدلی گلی قسمتده محمد

گل حضرت زهرا اولا گل صاحبی احمد

شایسته دی الحق گل اولسون گل سرمد

اون بیر خول آتوب هر گل اولوب زینت ابجد

هرتک تکی بیر مقصد وحدتده محمد

هرشاخه سینه فاطمه آد قویدی مجزا

فخر ائتدی همان آده ثرائیله ثریا

بیر شاخه نون آدینده حسین ائتدی مسما

ایگلردی اونی دامن عصمتده محمد

ایللر دولانوب بو گله بیر مسئله دوشدی

طوفانه دوشن گل کیمی الدن اله دوشدی

پرپر ائلیوب خار اونی مقتله دوشدی

گلدی او گلی تاپدی نه حالتده محمد ؟

از بسکی اونا اوخ توخائوب یوخدی شماری

داشلار توکولوب اوستینه آرتوبدی فشاری

قانی یارالاریندن اولور تپراقا جاری

آخدوقجا یازور صفحه ی تربتده محمد

قلبین داغیدوب اوخ ،‌داغیلان خیمه سرا تک

جسمین ائلیوب نیزه زره مثلی مشبک

اطرافینه تل تل سپیلوب آغ قره بیرچک

غرق اولدی ئوزی بحر مصیبتده محمد

سرچشمه کوثر تک اولوب پیرکی گوز گوز

قانیله دولوب آغزی بیلینمور نه دیور سوز

ایستور گوزون آچسون ولی قانیله دولور گوز

باخدوقجا باتور قلزوم محنتده محمد

بیر ناله دوتوب گوردی او صحرانی سراپا

دقت ائلینده تانیدی اول سسی طاها

اونداندا قاباق گوردی گلوب حضرت زهرا

سسلور یتیش امداده بو ساعتده محمد

القصه سوزوب مغربه عشقون گونی چاتدی

زهرا بالا وای سسلدی ال زلفینه آتدی

بو غمده نبوتله امامت یاسا باتدی

هادی اردبیلی

دوباره گلدی عید رسالت شیعه گوزون آیدین

یوز گتوروبدی بیزه سعادت شیعه گوزون آیدین

خاتمه تاپدی امر رسالت بو شخص زیبایه

بویوک شرافت نصیب اولوبدی بو گونده دنیایه

پیک خداوند عرض ایلیوبدی حضرت طاهایه

محول اولدی سنه رسالت شیعه گوزون آیدین

دیردی مولا اوخی بوگون سن اللهین آدیله

همان خداکی خلقی یاراتدی قطره ی قانیله

خلقه بولوندور بویوکدی الله عز و وقاریله

خالق ایدوبدی سنه کرامت شیعه گوزون آیدین

خلاص ایدوبدی جهانی الله جهل و جهالتدن

کل خلایق بوگون قوتاردی درد و ملامتدن

شیریندی کام جهانیان چون شهد رسالتدن

آچیلدی خلقه راه هدایت شیعه گوزون آیدین

خدا بوگون سن ختم ایلیوبسن رسالتین امرین

عنایت ایله قوتار خدایا امامتین امرین

شامل ایله سن بوجمعه الله شفاعتین امرین

هامی دیسونلر روز قیامت شیعه گوزون آیدین

تاج رسالت قویولدی راس امیر بطحایه

ختم اولاجاقدی امر شریعت وارث طاهایه

کل خلایق گوزون تیکوبدی مهدی زهرایه

ظهور ایدنده شمس امامت شیعه گوزون آیدین

هر کیمون وار اعتقادی حضرت پیغمبره

قلبیدن مسرور اولور چوخ بعثت پیغمبره

بعثت ختم رسل عید معظّم دور بیزه

چوخ مبارک گوندی بو گون، اوزگه عالم دور بیزه

سایر اعیاد مُعظمدن مقدّمدور بیزه

دویمیون بیر عید اولوب بو امّت پیغمبره

بدو خلقتده خدا خلق ایلیوب بو سروری

علّت غائی بودور ایجاد ایدوب عالملری

خلقی خلق ایتمز خداوند اولماسا پیغمبری

اوّلِ عالمده باخ بو عزّت پیغمبره

اشرفِ مخلوقیدی، خلّاقینه منظوریدی

نوری خلق اولموشدی لکن پرده ده مستوریدی

اوّل خلقتده ختم المرسلین مشهوریدی

عقل لر حیراندی اوّل خلقتِ پیغمبره

پرده ده مستور اولوب مدّتلر اول پاکیزه نور

گیچدی ایللر، هقته لر، آیلار، مرور ایلوب دهور

وقت اولوب آخِر زمان ایتسون او نوری حق ظهور

شایق اولموشدی بو عالم طلعت پیغمبره

اشرف مخلوق اولموشدی ازلدن منتخب

دور ایدوب چرخ اولدی بیست و هفتم ماه رجب

وقت او وقت اولدی که منسوب اولسون اول عالی نسب

پیک حق گَلدی او وقته خدمت پیغمبره

کوه حرّاده ازل اول سروره ایلوب سلام

حضرت معبودیدن گَتدی بو نوعیله پیام

ایله تبلیغ رسالت ای شه والا مقام

آگه اولسون خلق عالم رفعت پیغمبره

ایستدی خلّاق مخلوقی چخا کج راهیدن

نازل اولدی سوره ی اِقرا کلامُ اللهیدن

ایتدی اسلامی منزّه جبریدن اکراهیدن

اوّلین بیر لطفیدی بو ملّت پیغمبره

بولمدی افسوس امّت بیله لطفین عزّتین

آنّاماز بی عقل دُرّ پربهانین قیمتین

سالدیلار چوخ زحمته ایجاد عالم علّتین

ایتدیلر برعکس عوض اول رافت پیغمبره

آچدیلار ال جور و ظلمیله اونا اعدای دین

کول توکوبلر باشینه گاهی او قوم مشرکین

عقل کلّین ویردیلر گاهی جنونه نسبتین

باخمیوبلر دینیده جدّیّت پیغمبره

گوهر گنج الهیدی او کان فضل و جود

ایلمیشدی رهنما خلقه خداوند ودود

ایتدیلر اظهار کین امّا اونا قوم عنود

اولدولار باعث عناداً زحمت پیغمبره

ایتدی تبلیغاتینی مین رنجیله شام و سحر

ایتمدی اول سنگدل اعدایه بیر ذرّه اثر

گَلدی اول شهدن ظهوره آیت شقّ القمر

قویدولار سحر آدی امّا آیت پیغمبره

صرف ایدوب عمر شریفین دینه قویدی جانینی

دوزدی هر بیر زحمته خوشنود ایده جانانینی

محکم و مستحکم ایتدی دین حق ارکانینی

نازل اولدی آیه حقدن رحلت پیغمبره

« زائرا » عمرون تمام اولدی گلوب پیک اجل

آل طاها دامنین دوت صدق اوزیله چکمه ال

حدّسیز واردور گناهون سنده یوخ بیر خیر عمل

آغلا اخلاصیله یالوار حضرت پیغمبره

مرحوم زائر

گوز آچون غار حراده اوجالان نوره باخون

دوشنن کیمدی او نوریله دولان طوره باخون

گتروب باشلاری باشدان ایاقا شوره باخون

او محمددور آلبدور اله قرآن گترور

دییه بوللم که اُلن جسملره جان گترور

بشرون وجهه سی دوشموشدی حقیقت خطره

نه حیا حرمتی بیر کیمسه آلوردی نظره

نه گمان واریدی ظلمت گجه دونسین سحره

واریدی جامعه نین ایچره او اندازه مرض

هره اوز بولدوگین ایلوردی جهالتده غرض

شرف و شرم و حیادن بیری گورمزدی اثر

باجیلار قارداشا توشه یدی آتا قزلارا اَر

آرادان عقلی آپارمشدی هوس باز بشر

نه جوان جامعه ده صاحب درکیدی نه پیر

قمار اوینوردی آنا اوغلونی ایلوردی اسیر

ایله بول ملتین اولموشدی ایکی گوزلری کور

دیین اولموردی ایدن وقتیده هر کیم کیمه زور

گه ایدوردی عرب اوز قزلاری نی زنده به گور

او غروریله بشر بیر بیرین ایلوردی فنا

هارا اوز میلی چکوردی آپاریردی اویانا

بو قدر ملت ایتیرمیشدی مسیر و هدفین

ایکی بولموشدیلر الحق یاشایش صدفین

گورونوب گون کیمی پیغمبری دین حَنَفین

اوجالیق نورینه غرق ایتدی حیات بشری

هامیا روشن ایدبدور گینه خیریله شری

عَلَم نصر من اللهی رسول مدنی

گوتوروب چیگنینه مخلوقی اویاتدی علنی

اوزینه سیچدی وزیر الوزرا بوالحسنی

گرک اوّل دیدی هر نحویله بتلار توکوله

گله بوندان بیله هر نسلی بیر اللهی بوله

باشینا تاج نبوت که قویوب ختم رسل

اوزینه دین و شرف ایلدی مخلوق حصول

او که اسلامی خلوصیله گلوب ایتدی قبول

قییدوب عاطفه اوز مقصد معموله سینه

هره گوز تیکدی حلالیتین آیینه سینه

گورونوب حاصلی اسلامیده حُسن و حَسنات

تاپوب انسان یاشاماقدا اوزینه راه نجات

نجه سن گوندروسن آدینه هردم صلوات

هامی سکان سماوات اونی تحسین ایلیوب

سنه ده مزد پسندیده نی تعیین ایلیوب

بو گوزل دینی خداوند ایدوب عدلیله بنا

گوتور ال درگه والاسینه قیل حمد و ثنا

او قدر قالموری غفلتده یاتانلار اویانا

اوجالور گون به گون آفاقیده نور ازلی

اونا چون یار اولوب اوّلده خداوند جلی

نه بو عالمده اونون شأنینه بیر شأن چاتار

نه اونون امتی عالم بویی قرآنی آتار

نه ده که ارزشین انسان ایکی دنیایه ساتار

سر سوداسینه جان وردی علی شیر خدا

او علی که اونا زهرا اوزی نی قیلدی فدا

او گوزل دین یولوندا نقدر قان وریلوب

آدینا قانلی منالرده نه قربان وریلوب

شهدادن نچه میلیونلار اونا سان وریلوب

اونا مدرک دی اُحد خیبریلن بدر و حنین

توکولوبدور یره اوستونده اونین خون حسین

او یغوب بیر یره اعرابیله کُرد و عجمی

علمانین شعرانین سوزی شعر و قلمی

داخی قویماز یاتا اسلامین اوجالمش عَلمی

آدیوی سنده (امینی) یاز او دفترلره تا

قوی اوزوندن صورا آثار قالا بحرالبکا

امینی

بشارت سسی نُه سمادن گلور

یئره مژده عرش خدادن گلور

خبر، خاتم الانبیادن گلور

گلن کیمدی؟ سیر صفادن گلور

محمدّدی، کوه حرادن گلور

نزول آسماندان ایدوب پیک حق

دیلینده گوزل سوره، آدی عَلَق

اوخور بِسمِ رَب، مفخرِ ما خَلَق

یئره نور رحمت توکور نُه طبق

چهل ساله سالک دعادن گلور

محمددی کوه حرادن گلور

نه موسا نه عیسا،نه یونسدی بو

دلِ خلق بی یاره مونسدی بو

ستاره دیمه، ماه مجلسدی بو

گر اُمّی ده اولسا، مدرّسدی بو

که دانشگه لا یُرادن گلور

محمددی کوه حرادن گلور

نگاریم منيم گیتمه میش مکتبه

چاتوب معرفتده اوجا منصبه

اولوب عالم عاشق اوخال لبه

سالوب ذکری عشاقی تاب وتبه

دیله شور اوبانگ رسادن گلور

محمددی کوه حرادن گلور

گلور بت شکن بُتلاری سیندیرا

گلور مَحبط وَحیه پرچم وورا

قباقنده وار کیمده قدرت، دورا

ایدور افتخار عرشه، اُمّ القُرا

نوا مروه دن هم صفادن گلور

محمد دی کوه حرادن گلور

او مِرآت ایمان و روح صلات

گلور خلقه ویرسون بلاد نجات

دئ آختارما اسکندر، آب حیات

بودور ساقی چشمه ی کاینات

ایچوب جرعه آب بقادن گلور

محمددی کوه حرادن گلور

اوخیرالبشر عاشق نامدار

ایدوب یاریله رابطه برقرار

حرانین داغندان ئوزی استوار

بودور شاه لولاک، رف رف سوار

پیاده حریم وفادن گلور

محمددی کوه حرادن گلور

ایدور آسمان غبطه اجلالینه

باخور قدسیان منقلب حالینه

چاتوب طالب فیض، آمالینه

خلیل، آفرین سویلور، اقبالینه

ایدوب نفسی قربان منادن گلور

محمددی کوه حرادن گلور

قویوب باشه تاج شرف اول سفیر

ایدوب حقّ اونی کایناته امیر

بو ارزنده شاهه علی دور وزیر

امین رسالت، بشیرُّ النّذیر

دوتوب سبقت اهل ولادن گلور

محمددی کوه حرادن گلور

کلامی زنجانی

غریبه گوندی بو گون وار جلالت و شانی

همین جلالتی شاد ایلیوب مسلمانی

بو گونده یتدی حضور پیمبره جبریل

مقام اونداکی ایتموشدی کوه حرانی

گوروب نزول ایلدی جبرئیل و میکائیل

ازل یتوردی سلام خدای یکتانی

ملک یمین و یسارینده واردی یتمیش 

مینگلوب زیارت ایده اول مقام علیانی

اودمده قوردولا یاقوتیدن یره بیر تخت

ایدوبله ساکن او تخت استه طاهانی

قویوبدی باشینه تاج نبوتی جبریل

او مه جمالی اولوبدور علاوه نورانی

ایدوب او حضرته تعلیم سوره اقرا

بیانه گتدی هامی لفظ کل معنانی

دیدی رسالتوی امر حقدی خلقه یتور

بویوک کچیک هامی بلسون بو شرع قرانی

عروج ایدوب گویه جبریل و ملائکلر

ایدوب بو حکمته دارا هر علمه دارانی

لوای حمد الینده او حامد ازلی

ایدردی حمد و ثنای خدای اعلانی

مراجعت ایلدی مکه معظمیه

خدیجه منزلینه گلدی میر ربانی

او دم پیمبره هر بیر جماد ویردی سلام

رسول حق بلوبدور او شاه والانی

باخان زماندا خدیجه پیمبرین یوزینه

جمال پاکینین اولدی او دمده حیرانی

دیدی خدیجه سوله لا اله الا الله

رسول اکرمه حق امر ایدوب بو فرمانی

دیدی بلوردوم ازلدن فداک ام ابی

خدا سنه ویره جاق بو مقام علیانی

ویروبدی نچه خبر جبرئیل عالمده

ایدوم بیان سوزیمی گرچه اولدی طولانی

بیری رسالتیدی ذکر اولوندی جابرجا

ویروب بیرده خبر میلاد شاه عطشانی

ویرنده بو خبری اولدی عالمین دلی شاد

امان اوچومجی خبردن کسر توانانی

او ساعتیکه علی باشینی قلجلادیلار

بویاندی قانه نماز استه اول وفا کانی

بو ذکری بیر ده دیدی کربلاده جبرائیل

او دمکه یخدیلار اتدان غزیز زهرانی

جدا باشیندا دیوب راس شاه دین تکبیر

شهادت امرینین اولدی جداده اعلانی

مرحوم حامدی تبریزی

اِی مُسَلمان ؛ فَخر اِئله پیغَمبَروندور مُصطَفی

عیدِ مَبعَثدور بوگون مَبعوث اولوب اول مُقتَدا

یوزایگیرمی دورت مین ایچره اولدی خَتمُ الاَنبیا

روشَن اولدی نورِ حَقلَن ناگَهان غارِ حَرا

جَبرئیلی یوللایوبدی ذاتِ حَیِّ کِبریا

تا نبوَّت خَلعَتین پیغَمبَره اِئتسون عَطا

قیل تأَمُّل اِی مُسَلمان کیمدی گور پیغَمبَرون

مَظهَرِ خِلقَتدی پیغَمبَر ؛ اولوبدور رَهبَرون

چوخ مُبارَکدور بو بایرام آیدین اولسون گوزلَرون

دوز دولان دوز گَز آماندی؛وار قاباقدا مَحشَرون

سَعی اِئله مَحشردَه پیغَمبَر سَنَه فَخر اِیلیه

گَلجَگَین آدون او حَضرَت اُمَّتیمدَندور دیَه

شاخدی بیر نوری وِئروب غارِ حَرایه روشَنا

فَرقی وار نورِ زمینی لَن بودور نورِ خدا

نور ایچیندَه جلوه اِیلور حَضرَتِ خَیرُ الوَرا

ناگَهان بیر سَس اِئشیتدی یا مُحَمَّد مَرحَبا

اِقرَأ بِسْمِ رَبِّکْ ؛ اِی مَحبوبِ حَیِّ سَرمَدی

خاتَمُ الْمُرْسَلْ لیقی آلله سَنَه بَذل اِیلَدی

سَن پیَمبَرسن بو ساعَتدَن مُسَلمان اُمَّته

اَهلِ عِزَّت سَن ؛ یتیشدون حَقّ اَلیلَن عِزَّته

دَعوت اِئت خَلقُ الّلهی توحیدَه ؛ رازِ وَحدَته

آشنا اِئت اونلاری اسلامه ؛ دین رَأفَته

حَق سَنه وِئردی بوگوندَن چوخ بویوک بیر اِمتیاز

ذاتِ حَقِّ بی نیازیلَن اِئلَه راز و نیاز

گَتدی جبریلِ اَمین پیغام اَحَددَن اَحْمَدَه

سجدة شُکر اِیلَدی اَحْمَدْ خُدایِ سَرمَدَه

ناظریدی قُدسیانِ عَرش بو پیش آمَده

خاکی اِنسان وار یِری فَخر اِیلیه نُه گُنبَدَه

پاکی و تقوا ائدر اِنسانی مَنصَب صاحِبی

پاک بیرانسان اولوب بیر پاک مَکتَب صاحِبی

مکتَبِ اسلام دور مَکتَب لَر ایچره بهترین

دینِ رَحمَتدور ؛ مَحبَّتدور ؛ مَودَّتدور بو دین

شخصِ پیغَمبَر اولوبدی رَحمَهً لِلعالَمین

رَحمَت اول سَن اِی مُسَلمان خَلقَه پیغَمبَر کیمین

رَحمَت و زَحمَت آراسیندا فَقَط بیر نُقطَه وار

خوش او شَخصین حالینَه بو نُقطَه نی اِیلَر کنار

 جعفری زاویه

وجودون ویردی ایجاده شرافت یا رسول الله

دوتوب امّت سنه جشنِ ولادت یا رسول الله

سنه بیر درج بی مثل و بدلدور آمنه خاتون

سنون مثلون نه گوهر وار، نه دْرّ و لولوءِ مشحون

سببسن خلقته، هر ماخلق سنلن اولور مفتون

تاپوب هر کیم شقاوت یا سعادت یا رسول الله

بو وصف و سانه گلمز خلق اولانلاردان سن اشرف سن

خَلَقتُ آیه سینده کلمه و مصداق اُعرّف سن

معرِّف ذات پاک کبریادور، سن معرَّف سن

سنوندور بو مقام و بو سیادت یا رسول الله

صراط المستقیمه ایلیوب الله سنی منهاج

اولوالعزم و نبی و مرسلین الطافیوه محتاج

سلاطین بو خلایق فرض اولا، تارَکده سنسن تاج

ایکی دنیاده سنلن دور ریاست یا رسول الله

یارانموش ماسِوالله عالی و ادنی سنه خاطر

خلیل الله و نوح و آدم و عیسی سنه خاطر

کلیم الله و خضر و صالح و یحیی سنه خاطر

خدا سنلن ایدوب ختم رسالت یا رسول الله

سنه قربان اولوم که معنی حبل المتین سنسن

سنه قربان اولوم که رحمتاً للعالمین سنسن

سنه قربان اولوم اوّلین و آخِرین سنسن

ای امّت حافظی روز قیامت یا رسول الله

سنون تا نورون آفاقه گوره کُحل عیون اولدی

هامی اقشاریده نوشیروانلار سرنگون اولدی

غمی دیو رجیمون حدّ و حصریندن فزون اولدی

قیریلدی قید واهیّ عدالت یا رسول الله

سیناندا طاق کسری یعنی کسرانون بِلی سیندی

دگوب سدّ سدیده کفر و الحادین سِلی سیندی

یاتوب طوفان نفسانیّت و سلطه یِلی سیندی

گلوب فرهنگ دین، گیتدی جهالت یا رسول الله

سنون مازاد نوروندان خدا دنیانی خلق ایتموش

نه دنیا، بلکه جمله خلقته دارانی خلق ایتموش

بو فخرون بسدی سندن زهره ی زهرانی خلق ایتموش

کیمون وار اونداکی شان و جلالت یا رسول الله

اگرچه بولمدی قدرین بیر عدّه جاهل و نادان

ولیکن بو عداوتلر یتورمز شانینه نقصان

گلنده قائم اوغلی ایلینده عدلیله دیوان

اولار جرات ایدن اوندا خجالت یا رسول الله

خیالیم وار کلامی ختم ایدم من بو کلامیله

معطّر ایلیم انفاسی ذکر و لفظ و نامیله

دیم یعنی محمّد یاد صلوات و سلامیله

اولا سرمایه ی روز شفاعت یا رسول الله

خلایق فرد فردی کامل اولسا سن مکمّل سن

سنی منها ایدوب الله، جمیع جمعه حاصل سن

تبارک کلمه سی مضروب فهموندور که کامل سن

تاپوب سنده نهایت بی نهایت یا رسول الله

مرحوم حافظی تبریزی

مطالب مرتبط و پیشنهادی: اشعـار تـرکی عیـد مبعث - بخش اول