دال-دالا - عاشیق علی عسگر

دال-دالا - عاشیق علی عسگر

اسمین اوچ حرفله ائیله‌ییم بیان:
میمدی، نوندو، سین-یازیلیب دال-دالا،
من عاشقم دال-دالا،
بایقو گزر دال-دالا
آچیلیب یاخان بندی،
چك تورونجون دالدالا!
صدرین اوسته شوخ مه‌مه‌لر گورونور
بدنظردن پنهان ائله، دالدالا!
سورمه چك قاشینا، نه قارا یاخشی،
آغ اوستن یازیلا نه قارا یاخشی..
من عاشقم نه‌ قارا،
گوزلریندی نه قارا؟
عشقیندن مجنون اولدوم،
گور گونومو نه قارا!
ساچلارین گورنده نه قارا یاخشی،
اون‌دورد هوروك دوشوب دال-دالا.
علی‌عسگرم، من ده نشانه قویدوم،
تمیز آد ساخلادیم نشانه قویدوم.
من عاشقم نشانه،
زلف اوزونده نشانه.
سینه‌مه داغلار چکدین،
قالدی ائلده نشانه.
سینمی قارشینا نشانه قویدوم.
اسیرگه‌مه، آت اوخلارین دال-دالا.