نارین اوز - عاشیق علی عسگر

نارین اوز - عاشیق علی عسگر

کونول، سن‌ که، دوشدون عشقین بحرینه،
نارین چالخان، نارین سیلکین نارین اوز
دوست سنی باغینا مهمان ائیلسه،
آلماسین در. گلون ایگله، نارین اوز

تیکدیرمیسن قصر، ایوان، اودا سن،
او سیودیگین، او نوکرین، او دا سن!
قییا باخدین، منی سالدین اودا سن،
انصاف ائله گل کونلومون نارین اوز.

عاشق اولان سوزون دیمز ترسینه،
تر گزن دنیادا گیدر تر سینه؛
ترسینه‌یه قسمت اولسون ترسینه،
قوی سویکنسین نارین اوزه نارین اوز!

او روخصت ویر سوزوم دئیم قایماغا،
یویار غسال قدیم، بوکر قاییم‌ آغا؛
لذت ویرر بال قاتاندا قایماغا،
اونلاردان‌‌دا لذیذ اولار نارین اوز.

گل سینیق کونلومو ساری، دور گیدک!
ترلانسان اوولاتما ساری، دور گیدک!
علی‌عسگرم بیزه ساری دور گیدک!
بیر دردیمی ائیله‌ییبسن نارین، اوز.