اولار - عاشیق علی عسگر

اولار - عاشیق علی عسگر

حق مئیی اسلاما حرام بویوردو،
درد طغیان ائیلسه می ایچمک اولار.
دوستون مذمتی آدام ئولدورو،
دوشمننن سویوشوب، دویوشمک اولار.

اولار دوستون درددن قانانی،
هرکس قانسا اولار اونون ایمانی،
یامان اولار نامرد کسین یامانی.
مرد دشمن قانینا قاریشماق اولار.

بیر دوست که، دوستونون قدرین بیلمه‌یه.
دیلی دئییب اوزو-اوزه گولمه‌یه،
وعده وئریب ایلقارینا گلمه‌یه،
ائله دوستنان نجه باریشماق اولار؟

علی‌عسگرم، من ییتییم هر ايشه،
ایکی کونول بیر_بیرینن باریشا،
گؤز گؤزه باخاندا حالین سوروشا،
عالم دشمن اولسا، گوروشمک اولار