گرکدی - عاشیق علی عسگر

گرکدی - عاشیق علی عسگر

عاشق اولوب ترك وطن اولانین،
ازل باشدا پر کمالی گرکدی.
اوتوروب-دورماقدا ادبین بیله،
معرفت علمینده دولو گرکدی.

خلقه حقیقندن مطلب قاندیرا،
شیطانی ئولدوره، نفسین یاندیرا،
ائل ایچینده پاك اوتورا، پاك دورا،
دالیسینجا خوش صدالی گرکدی.

دانیشدیغی سوزون قیمتین بیله.
مجازی دانیشا، مجازی گوله.
کلمه‌سیندن لعل و گوهر سوزوله،
تمام سوزو معمالی گرکدی.

عارف اولا ایهامینان سوز قانا،
نامحرمدن شرم ائله‌یه، اوتانا،
ساعت کیمی میلی حقه دولانا،
دوغرو قلبی، دوغرو یولو گرکدی.

علی‌عسگر حق سوزون اثباتین ویره
عملین ملکلر یازا دفتره،
هر یانی ایسته‌سه، باخاندا گوره.
طریقتده بو سودالی گرکدی.