قالمادی - عاشیق علی عسگر

قالمادی - عاشیق علی عسگر

قرینه‌لر کئچدی، دوران دگیشدی،
پوزولدو قورغولار، میزان قالمادی.
زمانه بدگلدی؛ انسان بیج اولدو،
سیدده، ملادا ایمان قالمادی.

ییغیشسین دانیشاق قلیان چکنلر.
بوستان بجرنلر، اکین اکنلر،
آنانوو کاغذا توتون بوکنلر،
قورتاردی تنبکی، سامان قالمادی.

نجولدو، سئربییا، چورنوقورنایا؟
ال-آیاق آلتیندا ایتدی ایطالیا.
گرمان بیر بومب آتدی قان اولدو دریا،
قیریلدی دنیادا انسان قالمادی.

باغلانیب زاوودلار، کسیلیب قندلر.
قاینامیر ساماوار، آرتیبدی دردلر،
علی‌عسگر، آغلاییر قیزلار، آروادلار.
سوکولدو دشه‌کلر، یورغان قالمادی.