نه داماغی وار - عاشیق علی عسگر

نه داماغی وار - عاشیق علی عسگر

گوز گوزه باخاندا محبت‌ایله.
جگر آلیشماغین نه داماغی وار؟.!
گوزللرده عشوه اولار، ناز اولار،
سوزگون باخیشماغین نه داماغی وار؟!

قوشناروف توتونو، آنانوف کاغذ،
بوکه پاپروسونو بیر نورسته قیز،
بیر او اولا، بیر سن، بیر اطاق یالقیز
دئییب-دانیشماغین نه داماغی وار؟!

دورو قوللوغوندا جان و باشینان،
عشوه، غمزه‌اینن، گؤز و قاشینان،
گاهدان خوشلوغونان، گاه ساواشینان
کوکسونو آچماغین نه داماغی وار؟!

کونلوم مشتاق اولا، خط و خالینا.
ملاکه شکلینه، ماه جمالینا،
آلما کیمی یاناغینین آلینا
گوزون ساتاشماغین نه داماغی وار...

علی‌عسگرم، گورمه‌ینلر گوره‌سیز،
ال اوزادیب غنچه گولون دره‌سیز،
هردن کوسدوره‌سیز، کونلون آلاسیز،
سونرا باریشماغین نه‌ داماغی وار؟.!