دولانیر - عاشیق علی عسگر

دولانیر - عاشیق علی عسگر

آخشام، صاباح، چشمه، سنین باشیندا
بیلیرسنمی نجه جانلار دولانیر..؟
بیللور بوخاق، آلما یاناق، آی قاباق،
شاهمار زلفی پریشانلار دولانیر.

آفرین خدانین حقی-سایینا،
جماللاری بنزه‌ر بایرام آیینا،
بئله گوزللرین خاک پایینا
منیم کیمی چوخ قربانلار دولانیر.

گوردوم گوزل‌لیگین بیزه بیلدیریر،
قاش اوینادیب، خسته کونلوم گولدورور.
عشوه و ناز ایله آدام ئولدورور.
غمزه‌سینده ناحق قانلار دولانیر.

منی قوجا گوردو، روبندین آچدی.
آلا گوزلرینه گوزوم ساتاشدی.
هوش باشیمدان گیتدی، خیالیم چاشدی.
مرغ روحوم آسمانلار دولانیر.

آدیم علی‌عسگردی، گویچه-ماحاليم.
دولانیم باشینا، قادانی آلیم!
حوسنون شعله‌سینه خسته خیالیم
پروانه‌دی، شمعستانلار دولانیر!