خوش گلدین - عاشیق علی عسگر

خوش گلدین - عاشیق علی عسگر

قدم قویوب آستا-آستا
سن بو دیارا خوش گلدین!
سوزدوروب آلا گوزلری.
قاشلاری قارا خوش گلدین!

اوغرون دوروب قییا باخدین،
مژگانین سینمه چاخدین،
جسمیمی یاندیریب-یاخدین.
سالیبان نارا خوش گلدین!

قایناییب پیمانام دولوب،
گل رنگیم سارالیب-سولوب،
حسرتین چکمکدن اولوب
سینم صد پارا خوش گلدین!

دوستون وفاسینی گوردوم،
سئچیب سئودیم، کونول ویردیم،
تزه‌لندی کهنه دردیم.
دردیمه چارا خوش گلدین!

سینمدی عشقین دفتری.
سنسن دیلیمین ازبری،
یازیق عاشق علی‌عسگری
چکمگه دارا خوش گلدین.