قیسا تللرین- عاشیق علی عسگر

قیسا تللرین- عاشیق علی عسگر

آی قیز، سنین نه واختیندی
کسیلیب قیسا تللرین؟
کالاغایی الوان قییقاجی
اوستوندن باسا تللرین.

یاناخلارین گولدو، سولماز،
اوخلادین یارام ساغالماز،
قاشین جلاد، گوزون آلماس،
باغریمی کسه تللرین.

شکر سوزو، شیرین دیلی،
گوموش بیلنگ، نازيك الی.
آخشام، صاباح، سحر یلی
دگنده اسه تللرین.

وصفینه سوزلر یاراشیر،
قوللارین بوینومدان آشیر،
کهليك کیمی قاققیلداشیر
گلیبدی سسه تللرین.

باغبان آغلار بار اوجوندان،
خسته ئولر نار اوجوندان.
علی‌عسکرتك یار اوجوندان
باتیبدی یاسا تللرین.