احوالات ترکی وداع امام حسین علیه السلام - رحیم منزوی اردبیلی

احوالات ترکی وداع امام حسین علیه السلام - رحیم منزوی اردبیلی

آیردی     آشنالردن      سنی    بیگانه لر     قارداش

کول اولدی شمع  وصلونده  یانان پروانه لر قارداش

اوزون  مخمور   جام   وحدت  بزم   الست   ایتدون

او ته جرعیله یتمیش بیر نفر سربازی مست ایتدون

بنای   کاخ    دینه   ایله   ترمیم   شکست  ایتدون

فراموش اولدی  تاریخ   اورگَنَن  افسانه لر قارداش

قیامون   گوش  تاریخ   جهانه یاخشی  پند  اولدی

باخوب   ظرفیّت  فکریجه  هر کس بهره مند اولدی

یزیده   اگمدون   باش  آل  هاشم  سربلند  اولدی

باش   اَگمز   لولدولر  دیوانیه    فرزانه لر    قارداش

اَلون   قربانیم   آل   ذوالفقارون  باشلا  سن  جنگی

ویر   اوز   قانونله  دانشگاه   دینه   رشد    فرهنگی

یوواق    قوی   دامن   اسلامیدن   بو  لکّه ی  ننگی

اولا   رسوای   عالم     هندلر    مرجانه لر    قارداش

او    قرآن   که   امانتدور   سنه  جدّیم     پیمبردن

اولوب    مظلوم   او   قرآن  دولت  سفیان   کافردن

گیدوب   داد   ایله   اولما   ناگران  قاره  لچک لردن

باجون   زینبده   وار چوخ  همّت  مردانه لر قارداش

ئولوب اکبر باشون ساق واضح  ایتمه  لشکر  شرّه

بُوَلّر   سن   اوغولسوزسان   امان  ویرمَزله   بِالمَرّه

وقارون  پوزما  بشّاش اول، اوزون سیندیرما بیر ذرّه

مبادا   چوخ   سویونسون  لشکر   فتّانه لر  قارداش

اَلون قوی سینمه  قارداش منه صبر ایسته دریا تک

اولوم   محبوبه   صبریله   آنام   صدّیقه    زهرا  تک

یاناندا  خیمه لر   شهپر   آچوم   همّتلی  عنقا تک

سیخیلسون  سایَمه   بو سویگُلی دردانه لر قارداش

آیردوق   هر   مصیباتی   ازل  گون  مو به مو  سنلن

قوشولدی  لیلی   منلن  ، اکبر  خورشید  رو   سنلن

رقیّه    مندن   اولدی  ، اصغر   خونین   گلو    سنلن

سنه صحرای   غم  چاتدی منه  ویرانه لر   قارداش

گئجه لر قویمارام تا کیپریگیم دوشسون گوزوم اوسته

هر امره عهده دار اولسام دایانّام  اوز سوزوم اوسته

رقیَّن    یاتماسا   یرده   یری   واردور گوزوم  اوسته

علاوه   زلفینه  توز   قونسا زینب   شانه لر  قارداش

بُولور گیتماقلیقون  هر  سوز بولن قیز دیده گریاندور

سو  جامین   گیزلَدوب ، اظهار دردیندن  پشیماندور

دیولّر بو سوسوزلوق هجر اودوندان مین  یول آساندور

نه سن گیت، نه سو ایستور بو یانان پروانه لر قارداش

آلاردون   مسلمون   هر گون  قیزین  آغوشه  نازیله

اوپردون   یوز   گوزیندن  لطف   و   مهر    دلنوازیله

اونی دیندیرمه میش   گیتمه  باخور سوز  و گدازیله

نه تیز چخدی   یادوندان  عادت  روزانه لر  قارداش

یاشیل   یا    قرمزی    مَخمَل   دوتالّار   جلد   قرآنه

گرک    قرآن    ناطقده   گِیینسون   رخت    شاهانه

گِیورسن   کهنه    پیراهن    باخور  قیزلار   یانا  یانه

کیمه   قسمتدی بس بو خلعت شاهانه لر قارداش

سنی  ویرّم  قسم ای   دخت  زهرا  شاه  عطشانه

یِتور سن   ((منزوینون))   درد   پنهانین   او   سلطانه

دِنَن    لطفیله    یازسون    دائماً     شعر      ادیبانه

مذمّت ایتمسون   تا   عیب جو  بیگانه لر قارداش

❖ ❖ ❖ ❖ ❖

شعر از مرحوم رحیم منزوی اردبیلی